Қоғам • 25 Ақпан, 2021

Көршінің көп-көрім көмегі

14 рет көрсетілді

Қайырымдылық қолын созып, жанашырлық құшағына алу – халқымыздың ықылым заманнан бері бойына біткен ізгі қасиеттің бірі. Таяуда Петропавл қаласындағы Киров атындағы зауыт ұжымы Көкшетаудағы Шоқан Уәлиханов атындағы университетпен бірлесіп әлеуметтік жағынан аз қамтылған отбасылардың студенттеріне соңғы үлгідегі ноутбуктерді табыс етті, деп хабарлайды Egemen.kz.

Жастардың жанын жадыратқан бағалы сыйлыққа білім беру грантының жалпы конкурсы бойынша жоғары оқу орнына түскен студенттер лайық деп танылды. Бұл арадағы басты мақсат – білімді жастарға қолдау көрсету. Екінші бір қыры жастар арасында адамгершілік қасиеттерді насихаттап, айрықша мәнді маңызын ұғындыру. Зауыт өкілдерінің айтуларына қарағанда, мұндай іс-шаралар өткізу берік дәстүрге айналған екен. Осы бір қайырымдылыққа негізделген қадам арқылы әлеуметтік мәселелерді шешу барысында белсенділік танытып, өзгеге өнеге болуда.

– Бар жақсылық өсемін деген, білім аламын деген жастарға жасалуы керек, – дейді зауыт директорының орынбасары Қайрат Әлібеков, – бұған дейін төрт облыста әлеуметтік жағынан аз қамтамасыз етілген отбасыларға әрқилы планшеттер мен ноутбуктер сатып әпердік. Алдағы уақытта Ауған соғысы ардагерлерінің отбасыларына көмек көрсетпекшіміз.

Бағалы сыйлыққа ие болған студенттер мәз-мейрам. Жаман тұмау жайлағалы қашықтықтан оқу жүйесіне ауысқан олар «бұл жабдықтар бізге әбден қажет еді» дейді.

– Соңғы үлгідегі техникаларды білім алу жолында пайдаланамыз, – дейді университет студенті Вера Нурышева, – көрші облыстағы қайырымды жандардың көмегін ілтипатпен айта жүретін боламыз. Осындай уақытта ақжарқын ағалардың, ел болашағын ойлайтын азаматтардың жанашырлық жасағаны қандай жақсы.

Көршінің көмек қолын созуы құптарлық іс. Көршісі жақсының көші іркілмейді. 

Соңғы жаңалықтар

Елданаға ел риза

Спорт • Кеше

Жұмекеннің «Балаусасы»

Руханият • Кеше

Сүйіспеншілік сабағы

Аймақтар • Кеше

Ұқсас жаңалықтар