Сенат отырысында депутат Бірғаным Әйтімова Премьер-Министр Серік Ахметовтің атына депутаттық сауал жолдаған еді. Онда былай делінеді:
«Біздің депутаттық сауалымыз комитеттің өткен айдағы Маңғыстау облысына сапарының қорытындысы бойынша туындап отыр. Сапар барысында әскери қызметшілермен, шекарашылармен кездесулер өткізіп, олардың тұрмыс тіршілігімен, әлеуметтік жағдайымен таныстық.
Сенат отырысында депутат Бірғаным Әйтімова Премьер-Министр Серік Ахметовтің атына депутаттық сауал жолдаған еді. Онда былай делінеді:
«Біздің депутаттық сауалымыз комитеттің өткен айдағы Маңғыстау облысына сапарының қорытындысы бойынша туындап отыр. Сапар барысында әскери қызметшілермен, шекарашылармен кездесулер өткізіп, олардың тұрмыс тіршілігімен, әлеуметтік жағдайымен таныстық.
Еліміздің батыс өңіріндегі климаттық жағдай баршаға белгілі. Жаздағы күннің аптап ыстығы, ауаның жоғары температурасы, құрғақтығы, құм араласқан ыстық жел, ал қыстағы қытымыр аяз, жиі соғатын суық жел сол өңірде әскери қызмет атқаратын әскери қызметшілердің, шекарашылардың денсаулығына зиянды әсерін тигізетіні сөзсіз. Осыған байланысты Маңғыстау облысы ауыр экологиялық және климаттық жағдайдағы өлкеге жатады.
Еліміздің әртүрлі өңіріндегі күнкөріс жағдайын салыстырған кезде Ақтау қаласы Қазақстанның ең қымбат қалаларының бірі болып отыр. Осыған қарамастан, әскери қызметшілерге қосымша төлемақы қарастырылмаған.
Мысалы, әскери теңізшілердің әскери-кәсіби қызметі көп жағдайларда кемелерде ұзақ мерзімге қалу қажеттілігімен, су үстінде орналасқан, яғни тұрақсыз негіздегі жабдыққа қызмет көрсетумен, кемелерде жұмыс үдерісінің бірқалыпты жағдайдан жоғары қысымды, кернеулі жағдайға бірден ауысуымен байланысты. Әскери-кәсіби қызмет жағдайының аталған ерекшелігі жүзуші құрамның организміне тұрақты зиянды әсер етеді.
Қазіргі уақытта Қорғаныс министрлігінің осындай кәсіби ауыртпалық, қысым түсетін әуеде ұшу құрамына 50% үстемеақы төленеді.
Осындай жағдайда, кемелерде қызмет атқаратын әскери қызметшілердің санының аздығын ескере отырып, олардың кемелерде қызмет ету ынтасын көтеру үшін жүзуші құрамға кемелерде қызмет етудің ерекше жағдайына байланысты, ақша үлесіне 50% және теңізде жүру өлшем уақытына сәйкес 30% үстемеақы енгізу мәселесін қарастыруыңызды өтінеміз.
Сонымен қатар, теңіз сүңгуірлерінің жұмысы ең күрделі жұмыстардың бірі болып табылады. Ол аварияға түскен кемелерге көмек көрсетумен, адамдарды құтқарумен, суға батқан кемелерді көтеріп шығарумен, барлаумен және десантқа қарсы бөгеттерді талқандаумен, қарсыластың миналарын іздеумен және жоюмен, басқа да су асты қауіпті жұмыстарын атқарумен байланысты болып келеді. Сүңгуірлер су астына түсу уақытында әртүрлі әсерлерге ұшырағыш, мысалы, қан қысымы бірден түсіп кетуі, жарақат алуы және басқа да тосын жағдайларға тап болуы мүмкін.
Жоғарыда көрсетілгендердің негізінде сүңгуірлердің жұмысты атқару жағдайына және су астындағы өлшем уақытына сәйкес 100%-ға дейін үстемеақы енгізу жағдайын қарастыруыңызды сұраймыз».
