Іс-шараны Елбасы кітапханасының Музей құндылықтарын есепке алу және сақтау қызметінің басшысы Күләйша Ақтаева ашып, мектеп оқушыларының республикалық және халықаралық байқаулардағы жетістігі БКМ ЮНЕСКО клубының дарынды педагогтер командасының, оның ішінде ҚР Суретшілер одағы мен Халықаралық суретшілер одағының мүшелерінің көпжылдық қажырлы еңбегінің нәтижесі екенін атап өтті.
«Жаһандану жағдайында біз санамыздың негізін жоғалтпау үшін кім екенімізді, рухани тамырымыз бен тұрмысымыздың құрамдас бөліктері қандай екенін түсінуіміз керек. Бір таңданатыны, пандемия жағдайында әлеуметтік қашықтықты сақтай отырып, біз бір-бірімізге жақын болу қажеттілігін сезінеміз. Адамдар қарым-қатынасты аңсайды, өздерінің жаңа қырларының ашылуын күтеді. «Туған өлкем» бағдарламасы үйден тыс жерде қалыптасатын ортаға бағытталған. Бұл өте маңызды, өйткені отбасында бала өзінің жеке тұлға ретінде қалыптасуын тек білім мен пайдалы дағдылармен толтыра алмайды. Сондықтан педагог-суретшілер – ерекше саңлақтар», деп атап өтті К.Ақтаева.
Көрмеде Табиғат Құжанбаев, Нұрболат Асқар, Гүлбарам Асқарова, Айзада Аманжолова, Гүлфара Тукина, Айнагүл Туғанбекова, Сәуле Жандуллаева, Олжас Бекенов, Биназир Жұмабекова, Дана Қамалова сынды суретші-оқытушылардың шығармашылық ізденістерінің нәтижесінде түрлі жанрлар мен бағыттарды қамтыған 60-тан астам туынды ұсынылды. Авторлар өз еңбектерінде қоршаған әлемге деген өз көзқарастарын көрсетіп, отбасына, елге, өз халқының мәдениетіне деген махаббатын суреттей білген.
«Суретші – барлық әдемілікті көре білетін әрі оны жеткізе алатын адам. Әлемнің көркем бейнесін, атмосферасын сақтау өте маңызды. Қазіргі технологиялар мен техникалар адамдар арасындағы қарым-қатынасқа кедергі келтіріп жатқандықтан, өзімізді танып-білуге, жан-жағымызды бағалауға, қоршаған ортамызды аялауға жасалып жатқан керемет дүние. Бұл басқосу осы көрменің маңызды міндеттерінің бірі деп ойлаймын», – деп ой бөлісті Балалар көркемсурет мектебінің мұғалімі, суретші Нұрболат Асқар.
Іс-шара соңында Елбасы кітапханасының атынан ұстаздарды Бейнелеу өнеріндегі жоғары кәсіби біліктілігі және балалар шығармашылығын дамытуға қосқан елеулі үлесі үшін арнайы сертификатымен марапаттау рәсімі өтті.
Көрме қонақтары суретшінің импровизацияланған шеберханасында шығармашылық атмосфераны сезінді. Шеберлік-сынып барысында тәжірибелі тәлімгердің жетекшілігімен әркім өз көркем туындысын жасады.
Нұр-Сұлтан қаласындағы Балалар көркемсурет мектебі ЮНЕСКО клубы Елбасы кітапханасының байырғы серіктесі ретінде 2005 жылдан бері көптеген көрмелер, фестивальдер, шеберлік-сыныптар, шығармашылық кездесулер және басқа да іс-шаралар өткізіп келеді. Ынтымақтастықтың басты нәтижелерінің бірі музей ғимаратындағы (Нұр-Сұлтан қаласындағы БКМ ЮНЕСКО клубының филиалы) балалар бейнелеу студиясының жұмысы болып табылады.
«Шығармашылық: қабілет, әуестік» көрмесі Қазақстан Республикасының Тұңғыш Президенті – Елбасы кітапханасы музейінде (Бейбітшілік к-сі, 11) осы жылдың 31 наурызына дейін жалғасады.
