Президент сөйлеген сөзінде шетелдіктерге және шетелдік заңды тұлғаларға ауыл шаруашылығы жерлерін сатуға, жалға беруге заң жүзінде біржола тыйым салуды тапсырды. Сондай-ақ бұл тапсырманы тез арада орындауды айтты. Бұл Кеңес мүшелері ғана емес, жалпы дүйім жұрттың күткен шешімі еді. Сол себепті де Мемлекет басшысының бұл шешімін тарихи оқиға ретінде бағалаймын.
Тағы бір разы болғаным, Қасым-Жомарт Кемелұлы тоқталып, тапсырма берген бес мәселенің бесеуі де қарапайым халықтың өмірі мен тұрмысына қатысты. Мысалы, тұрғын үй және экономика саясатын жетілдіру. Ендігі уақытта ауылды жерлерге тұрғын үй салған компаниялардың жалпы шығынының жартысын Үкімет төлеп беретін болды. Ауыл халқының қалаға ағылуын тоқтатуға, ауыл шаруашылығын дамытуға өте пайдалы шешім.
Кеңесте мүмкіндігі шектеулі адамдардың мәселелері де назардан тыс қалған жоқ. Президент мүгедектікті анықтау рәсімдерін түбегейлі жеңілдетуді тапсырды. Шыны керек, Nur Otan партиясына мүгедектік мәртебесін алудың қиындығы туралы азаматтар көп арызданады. Міне, енді бұл мәселе де өз шешімін тапты. Өз басым Президенттің бүгінгі шешімдері мен тапсырмаларына қатты риза болдым.
Ауыт МҰҚИБЕК,
Ұлттық қоғамдық сенім кеңесінің мүшесі, қоғам қайраткері
