Қоғам • 01 Наурыз, 2021

Бойымда қазақылық бар

150 рет көрсетілді

Жерді жеті айналса да қазақ халқындай бауырмал, қонақжай халықты таппайтын шығар ешкім. Қай заманда да бас сауғалап, сырттан келгендерді ұлтына, ұлысына қарамастан, бауырға бас­ты. Қолындағы соңғы нанымен бөлісті. Тіпті сонау қызылдардың қылышынан қан тамып тұрған жылдары қуғынға түскендерді үйіне де жасырғанын білеміз.

Қыс қыстауын, жаз жайлауын жайлап жатқан қазақтың жеріне Екінші дүниежүзілік соғыс жыл­дары түрлі ұлт өкілдері қоныс ауда­ра бастаған. Қайдан келіп, қай­­да тұрғанын білмей аңтарылған елді көргенде қазақ елі бөтенсі­­мей, төрге оздырды. Аяқтан тұ­рып кету­леріне септесті. Үй-жайын көтеруге көмектесті. Қазақтың қа­ра­п­айымдылығының арқасында біз­дің бабамыз да қазақ еліне тез сіңісіп кетті.

Менің туған атам мен апам – Николай Егорович пен Мария Гри­горьевна Ресейдің Алтай өл­ке­сінен Қазақстанның шығысы­на 1950-жылдары табан тіреген. Тегі, табиғаты ұқсас болған­дық­тан шығар, бұл аймаққа қуана-қуана көшіп келіпті. Алтай өлкесін­де совхоз басқарып жүрген атам Николай Қазақстанға келген соң да сол қызметін жалғастырып­ты. Қызмет ете жүріп, Өскемен өңірінде ұрпағын өрбітті, зейнетке шықты.

Ол соғыс ардагері еді. Атам өмірден өткенімен, немерелеріне өсиет ретінде Қазақ елінің құшақ жая қарсы алғандығы туралы естелік айтып отыратын. Қазақ халқының бауырмал екенін атамның әңгімесінен ғана емес, бүгінгі күнде де көріп жүремін. Арғы тегім Ресейден болғанымен, менің Отаным – Қазақстан. Ол даусыз. Атам сол бір аласапыран заманды көп есіне алғысы да келмейтін.

Атам мен апам Шығыс Қазақ­стан­ға көшіп келгенде өздерін өзге елге келгендей сезінбепті. Жергілікті тұрғындармен етене араласып кеткен. Елуінші жылдары басталған аралас-құраластық әлі үзілген жоқ.

Менің ұлтым орыс болғанымен, бойымда қазақылық бар. Оны Ресейге барғанда анық сеземін.

Бүгінде үш бала тәрбиелеп отырған бақытты анамын. Қазақы мәдениетті, салт-дәстүрді бойыма сіңіріп алғанымның бір дәлелі – дастарқанымнан бауырсақ, құрт-ірімшік үзілмейді. Құдай осындай ауызбіршілігіміз жарасқан бейбіт өмірден айырмасын.

 

Вера ПРАВДИНА,

Өскемен қалалық орыс мәдени орталығының төрайымы

 

Шығыс Қазақстан облысы

 

Соңғы жаңалықтар

Дамудың сенімді іргетасы

Қазақстан • Кеше

Іні-досқа ілтипат хат

Руханият • Кеше

Ақтөбеде карантин жеңілдеді

Коронавирус • Кеше

Ертең ауа райы қандай болады?

Қазақстан • 23 Қазан, 2021

9 су қоймасы салынады

Экология • 23 Қазан, 2021

Ұқсас жаңалықтар