Сыбайлас жемқорлыққа қарсы іс-қимыл агенттігінде Е-кадрлар жүйесі енгізілуде

Қоғам • 01 Наурыз, 2021

Сыбайлас жемқорлыққа қарсы іс-қимыл агенттігінде Е-кадрлар жүйесі енгізілуде

11 рет көрсетілді

Агенттіктің кадр саясатындағы басты бағдар - сыбайлас жемқорлыққа қарсы күрес үшін жаңа көзқарас пен батыл идеяларды ұсынуға қабілетті, жігерлі талантты адамдарды тарту және өз қатарында ұстау болып отыр. Бұл туралы Сыбайлас жемқорлыққа қарсы іс-қимыл агенттігінің Аппарат басшысы Қуаныш Жапақов мәлім етті, деп хабарлайды Egemen.kz.

Marzhan Tileubekova

Қуаныш Жапақовтың айтуынша, аталған бағдардың басты құралы уәждемелеу және жоғары жалақы. Оны қамтамасыз ету үшін органның ұйымдық-штаттық құрылымын және ішкі бизнес-процестерін оңтайландыру бойынша үлкен жұмыстар атқарылған.

- Оның нәтижелері бойынша артық басшылық буындар 2 есеге жуық қысқартылды, басқарушы лауазымдар саны 453-тен 240-қа дейін азайтылды (басшылардың орындаушыларға арақатынасы 1-ден 7-ге дейін жеткізілді), қосалқы қызметтердің қызметі орталықтандырылды, өңірлік бөлімшелердің 90% - ы таратылды. Соның салдары ретінде алаңдарды, көлікті күтіп ұстауға, ұйымдастыру техникасы мен шаруашылық тауарларын сатып алуға және басқа да шығындарға ілеспе әкімшілік шығыстарды оңтайландыру жүргізілді, деді ол.

Оңтайландыру қорытындысы бойынша қаражатты үнемдеу цифрландыруға, «ANTIKOR ORTALYGY» сервистік орталығының құрылысына, қызметкерлердің жалақысын арттыруға және оларды материалдық уәждемелеу үшін сыйақы қорын қалыптастыруға бағытталған, нәтижесінде қызметкерлердің табыс мөлшері екі есеге дерлік артты.

- Бұл жобаны іске асыру тағы бір маңызды міндетті шешуге - құқық қорғау қызметінің беделін арттыруға ықпал етті. Жеке компаниялар қызметкерлерінің еңбекақысының мөлшерімен салыстырылатын жалақының жоғары деңгейі азаматтық сектордан және басқа да мемлекеттік органдардан жоғары білікті кадрлардың келуін қамтамасыз етті, дейді ол.

Сондай-ақ Қуаныш Жапақов қазір жеке құрам басқа құқық қорғау және арнайы органдардың жоғары білікті мамандарымен айтарлықтай күшейтілгенін атап өтті.

- 7-еуінің Президент Әкімшілігі мен Премьер-Министрдің Кеңсесінде, 15-інің ұлттық қауіпсіздік органдарында, 29-ының прокуратурада, 17-сінің азаматтық секторда жұмыс тәжірибесі бар. Оның ішінде әрқайсысы Агенттіктің ұйымдық құрылымында маңызды орындарға ие.

Агенттіктегі мемлекеттік қызметтің беделі мен тартымдылығын атап өткен жөн. Мұны бізге жұмысқа кіруге ниет білдірушілердің саны дәлелдейді. Осылайша, «Б» корпусының бос лауазымдарына орналасуға арналған конкурстарға орта есеппен бір орынға 21 үміткер қатысады. Бұл басқа орталық мемлекеттік органдарға үміткерлердің орташа көрсеткішінен 3 есе жоғары – бір орынға 7 адам.

Жалпы жекелеген лауазымдарға конкурсқа қатысушылар саны 1 орынға 37 адамға дейін жетеді, - деді ол.

Айта кетейік, кадр саясатын құру кезінде қызметкерлердің білім сапасына баса назар аударылған. Қазіргі уақытта Агенттікте шетелдік жоғары оқу орындарының 32 түлегі жұмыс істейді, олардың 12-і «Болашақ» бағдарламасы бойынша білім алған. 2 қызметкер PhD дәрежесіне ие, тағы екеуі оны алуға дайындалуда, 10 қызметкер ғылым кандидаты, 127-сі магистр.

Сонымен қатар, қазіргі уақытта шетелдік жоғары оқу орындарында 7 адам, оның ішінде алтауы «Болашақ» бағдарламасы бойынша білім алуда. Ал Сот төрелігі академиясында – 2, ҚР Президентінің жанындағы Мемлекеттік басқару академиясында – 3, Құқық қорғау органдарының академиясында – 2 адам докторантура және магистратура бағдарламалары бойынша оқуда.

Сыбайлас жемқорлыққа қарсы іс-қимыл агенттігі Аппарат басшысының айтуынша, Агенттіктің 5 қызметкері Президенттік Жастар кадрлық резервінің мүшесі. Бұл ведомствоның аз санын ескере отырып, мемлекеттік органдар арасындағы ең жоғары көрсеткіштердің бірі екенін де тілге тиек етті.

- Агенттік қызметкерлері жоғары кәсіби қасиеттерден басқа әртүрлі салаларда басқа таланттарға ие. Мысалы, Қарағанды облысында таэквондодан Халықаралық дәрежедегі спорт шебері, 1-дан қара белбеу иегері, екі дүркін әлем чемпионы, Әлем кубогының абсолютті иегері Әлия Сүлейменова жұмыс істейді. Көптеген қызметкерлер шығармашылықпен айналысады, олардың кейбіреулері республикалық конкурстардың лауреаттары. Ақмола облысы бойынша департаменті басшыларының бірі Арман Бердалин халықаралық және республикалық айтыстардың жеңімпазы, бірнеше өлең кітаптардың авторы, ақындардың халықаралық одағының мүшесі, - деді Қуаныш Жапақов.

Күннің маңызды және өзекті жаңалықтарын «Егемен Қазақстан» телеграм каналынан оқыңыз