Бұл туралы Өңірлік коммуникациялар қызметі өткізген баспасөз конференциясында облыстық ТЖД басшысы Ернур Өтегенов айтты.
- Жыл сайын көктем айларында қар немесе Ертіс өзеніндегі мұздың еруімен облыс ауылдарын су басып қалатыны белгілі. Қазіргі кезде 28 ауылды елдімекенді су басу қауіпі бар. Бірақ күзгі топырақтың ылғалдануы биылғы жылға қарағанда 10 пайызға артты. 2019-2020 жылдары Баянауыл ауданында ащы су өзенінің маңында 3 млрд теңгеге арнасын тазалау, бұрмалау жұмыстарын, дамбаларды көтеру жұмыстар жүргізілді. Соның арқасында су жанындағы елді мекендерге жайылу қауіпі төмендеді. Қазір қауіп төнуі ықтимал жерлерде жұмыстар жүргізілуде, - дейді Ернур Өтегенов.
Оның айтуынша, былтыр Ақтоғай ауданының Шұға ауылында, Май ауданының Ақсарай ауылында «Жол картасы» шеңберінде бес қосымша дөңгелек құбыр салынып, судың жайылып кетуіне тосқауыл қойылған.
- Қазіргі уақытта Баянаул ауданында «2021-2023 жылдарға арналған су тасқынына қарсы іс-шаралардың жол картасы» бағдарламасы аясында көпір салу жұмыстары басталды, - дейді Ернур Өтегенов.
Айта кетейік, 4-5 наурыз күні өңірде «Көктем-2021» оқу-жаттығу өтеді. ТЖ департаментінің басшысы құлақтандыру жүйесін іске қосылатындықтан, тұрғындарды үрейленбеуге шақырды.
