Көрменің ашылу салтанатында «Абылай хан музей кешенінің» директоры Аян Садаев сөйлеп, Әлихан Бөкейханның қазақ халқының тарихындағы орны туралы баяндап, жылжымалы музейге қойылған экспонаттар әрбір көрерменге ұлт көсемі туралы танымды молайта түсетінін айтты. Осыдан кейін салтанатта М.Қозыбаев атындағы Солтүстік Қазақстан университетінің тарих және әлеуметтік гуманитарлық пәндер кафедрасының меңгерушісі Нұрболат Әбуов сөйлеп, жиналғандарға Әлихан Бөкейханның тарихи еңбектері туралы біршама мағлұматтар берді. Сөз берілгенде біз де Әлиханның журналистік еңбегі туралы баяндап, оның «Степной край», «Орыс-Сібір географиялық қоғамының басылымдарында қазақ халқы туралы көптеген мәліметтер жазып, орыс оқырмандарына ұлтының әдебиеті мен өнерінен мол мағлұматтар беріп тұрғаны туралы айттық. Ал жас ақын Диас Аяған Әлиханға арнаған өлеңін оқыды.
Музейде Әлихан Бөкейханның Санкт-Петербургтың императорлық орман шаруашылығы институтын бітірген аттестатының көшірмесі де бар екен. Қазақ даласынан келген жас жігіт екі-ақ сабақтан төрт алыпты, қалғанының бәрі бес екен... Басқа құжаттардың да маңызы зор. Соның ішінде «Орыс –Сібір географиялық қоғамының» газетіне ұлы Абайға жазған қазанамасының да түпнұсқасының көшірмесі тұр. Орыс оқырмандары түгіл қалың қазақ та біле бермейтін деректер бұл ұзақ қазанаманың өне бойынан орын алған. Бір сөзбен айтқанда Әлихан Бөкейхан туралы көрермендерге берер дерегі мол.
ҚЫЗЫЛЖАР
