Осы келісімнің негізінде тұтынушылардың құқықтарын қорғау жүйесін жетілдіруге, сондай-ақ Үкіметтің жол картасында көзделген іс-шараларды бірлесіп іске асыруға басымдық беріледі. Бұған қоса IX Азаматтық форумда қоғамдық бірлестіктер айтқан ұсыныстар да назарға алынып отыр.
Былтыр құзырлы орган тұтынушылардың құқығын қорғайтын 55 қоғамдық бірлестіктің қатысуымен бірнеше онлайн кездесу (жұмыс топтары, конференция) өткізген еді. Аталған басқосуларда Министрліктің тарапынан бірыңғай ұлттық тұтынушылар қауымдастығын құрудың өзектілігі жайлы, қоғамдық ұйымдардың құрамына кірудің маңыздылығы туралы, сондай-ақ тұтынушылардың құқықтарын қорғау жөніндегі омбудсмен институтын енгізу қажеттілігі сынды бастамалар жөнінде түсіндірілді. Демек, ұлттық қауымдастықтың құрылуымен еліміздің барлық өңірінде оның филиалдары ашылып, одақтарды қайта форматтау «саннан сапаға» ұранымен өтпек. Бұл кәсіби ұйымдар қатарынан қалыптасатын бірлестіктер қызметіндегі тар бейінді бағыттарды дамытуға басымдық берілетінін аңғартады.
Ведомствоның мәліметіне сүйенсек, ең белсенді деген 30 қоғамдық бірлестік министрлік бастамаларын қолдап отыр. Қоғамдық ұйым өкілдері Тұтынушылардың ұлттық қауымдастығы «Қазақстан тұтынушыларының республикалық қауымдастығы» ЗТБ базасында құрылса деген ұсыныстарын жеткізіпті. Себебі оның құрамына қаржы, білім беру, ТКШ, туристік және медицина саласында тұтынушылардың құқықтарын қорғауға маманданған қоғамдық бірлестіктер кіреді.
Жоғарыдағы ұсыныстарды ескеріп, министрлік «Қазақстан тұтынушыларының республикалық қауымдастығы» ЗТБ-мен ынтымақтастық туралы меморандумға отыруды құп көрген. Осылайша, мүдделі тараптар аталған құжат үкіметтік емес ұйымдарға тең мүмкіндіктерді қамтамасыз ететініне және тұтынушылардың құқығын қорғау мәселесінде мемлекеттің қатысуын барынша азайтатынына сенімді.