Қазақстанда екі жастан он төрт жасқа дейінгі балаларға әуе билеттері тегін берілетін бағдарлама ашылады. Осыған байланысты балалар Kids go free бағдарламасы арқылы тегін саяхаттай алады.
Kids go free бағдарламасының негізгі мақсаты – қазақстандықтарды елдің туристік бағыттарында отбасымен демалуға ынталандыру. Мұндай мүмкіндік балалар әуебилеттерін субсидиялау арқылы беріліп отыр. Мәдениет және спорт министрлігінің болжамынша, мұндай жеңілдік демалысты 30 пайызға дейін арзандатуға мүмкіндік береді.
Тегін әуе билеттері туристік саланы дамытудың 2019-2025 жылдарға арналған мемлекеттік бағдарламасында айқындалған басым туристік аймақтардың (БТА) топ-10 бағыты бойынша қолжетімді болады. Оларға мына аймақтар кірді:
1) Алакөл көлі;
2) Алматы өңірінің тау кластері;
3) Щучье-Бурабай курорт аймағы;
4) Баянауыл курорт аймағы;
5) Имантау-Шалқар курорт аймағы;
6) Балқаш көлі;
7) Түркістан;
8) Маңғыстау жағажай демалыс аймақтары;
9) Нұр-Сұлтан қаласында MICE-туризмді дамыту (корпоративтік іс-шараларды ұйымдастыру және өткізуге байланысты іскерлік туризм - ред. еск.);
10) Байқоңыр ғарыш айлағы.
