«ӨКМ Операторы» екі шаһарға да заманауи қоқыс сұрыптау желісін сатып алуды қаржыландырып отыр. Осы жобаны жүзеге асыруға барлығы 3,7 млрд теңге қаражат бөлінген.
Аймақта қатты тұрмыстық қалдықты бөлек жинау үш фракция бойынша жүзеге асырылмақ. Яғни қалдық үшке бөлініп тасталады. Мәселен, «Жеңіл» – қайта өңделетін қайталама шикізат (пластик, қағаз, металл), «Ауыр» – бұған шыны қалдығы жатады. Үшінші «Дымқыл» – оған қайта өңдеуге келмейтін қалдықтар (тамақ қалдықтары және тағы басқалар) тасталады.
– ӨКМ Операторы Шығыс Қазақстанның екі қаласы үшін 12 бірлік арнайы техника сатып алды. Оның ішінде шыны контейнерлеріне қызмет көрсетуге арналған кран-манипулятор қондырғысы орнатылған 4 қоқыс тасығыш көлігі бар, – деді «ӨКМ Операторы» ЖШС төрағасы Медет Құмарғалиев.
Айта кетейік, Өскемен мен Семей қаласында тұрмыстық қалдықты сұрыптап жинау инфрақұрылымын ұйымдастыру жөніндегі жобаның басты шарасы – ағымдағы жылдың қыркүйек айында өндірістік қуаты жылына 200 мың тонна тұрмыстық қалдықты сұрыптайтын автоматты желіні салу және іске қосу болмақ.
Аталған кешенді жұмыс өңірдегі қалдықтарды қайта өңдеу көлемін ұлғайтуға, тұрмыстық қалдықты бөлек жинау инфрақұрылымын дамытуға, сондай-ақ жаңа жұмыс орындарының ашылуына мүмкіндік береді.
