Әлеуметтік медициналық сақтандыру жүйесінің басты мақсаттарының бірі – көмек көрсетудің қолжетімділігі мен сапасын жақсарту. Сондықтан, МӘМС қаражаты есебінен ауыл халқына медициналық тұрғыда көмек көрсетуді жылжымалы медицина арқылы қолға алған.
Жақында Катонқарағай ауданының аудандық ауруханасынан ауылдарды аралауға алғаш рет жылжымалы медициналық кешенмен жабдықталған автобус шықты. Олар күн райының күрт құбылуына қарамастан, алыстағы Ново-Поляковка ауылына дейін барып қайтты.
Автобусқа қондырылған мобильді диагностикалық медициналық орталықтың бір ерекшелігі – жылы және суық жағдайларда жұмыс істей береді. Мұндағы мамандар күніне 60-қа жуық науқасты медициналық тексеруден өткізуге қауқарлы. Медицина мамандарының қатарында невролог, офтальмолог, санолог, педиатр, акушер-гинеколог, зертханашы, терапевт бар. Салонда гинекологиялық тексеру үшін де орын қарастырылған. Мәселен, акушер-гинеколог 25 пациентті қарап шықса, жалпы практика дәрігері 52 тұрғынды, невропатолог 20, педиатр 6 баланы тексерді. 20 адам сандық рентгеннен, тағы сонша адам ультрадыбыстық диагностикадан өтті. Көз жанары сыр берген 31 тұрғын окулистке қаралды. Айтқандай, халық әлеуметтік медициналық сақтандыру шеңберінде дәрігерлік қызметтерді тегін алды.
– Жылжымалы медициналық кешен арқылы ауыл тұрғындары толық тексеруден өте алды. Әйтпесе, тексерілу үшін 60 шақырымдағы аудан орталығына баруға тура келер еді. Ол жақта ұзын-сонар кезек күтуің керек. Әсіресе, бұл қарттар мен балалар үшін қиын. Жылжымалы кешеннің келгеніне ауыл болып қуандық, – дейді Ново-Поляковка ауылының тұрғыны Зинаида Прокопьевна.
Айта кетерлігі, автобус лифтімен және пандуспен жабдықталғандықтан, мүмкіндігі шектеулі адамдарға да аса қиындық туындатпады. Катонқарағай орталық аудандық ауруханасының бас дәрігері Сәуле Байгерееваның айтуынша, осыдан былай жылжымалы кешен ауылдарға тұрақты түрде барып тұрады. Сол мақсатта жылжымалы медициналық кешеннің шалғай ауылдарға тұрақты бару кестесі жасалды.
Шығыс Қазақстан облысы
