![Әулиеата жеріндегі әдемі күн](/media/2021/03/25/img_7522.jpg)
«Ежелгі Тараз ескерткіштері» мемлекеттік тарихи-мәдени қорық-музейінің ұйымдастыруымен Ұлыстың ұлы күні – Наурыз мейрамы аталып өтті. Сонымен қатар мерекелік шара барысында қазақтың тұсаукесер, беташар сияқты ұлттық салт-дәстүрлері де дәріптелді. Әсіресе, шараға келген жастарға баланың тұсауын кесу, келіннің бетін ашу сияқты ғұрыптар таныстырылды. Аталған мекеме ауласына киіз үй тігіліп, алтыбақан құрылды. Шара барысында аталған қорық-музейдің директоры Нұрлан Бықыбаев көпшілікті Ұлыстың ұлы күнімен құттықтаса, Шерхан Мұртаза атындағы облыстық руханият және тарихтану орталығының директоры Сауран Қалиев Мемлекет басшысы Қасым-Жомарт Тоқаев өзінің «Тәуелсіздік бәрінен қымбат» атты мақаласында Наурыз мейрамын лайықты деңгейде атап өтуді тапсырғанын, соған сай өңірде Ұлыстың ұлы күні тойланып жатқанын жеткізді. Ал облыстық тарихи-өлкетану музейінің директоры Сейітжан Ілияс жиналған көпшілікті Наурыз мерекесімен құттықтап, елімізге амандық, жерімізге береке тіледі. Сондай-ақ Мәдина Сағынбекова, Жанар Өзтемірова сынды өңірге белгілі әншілер әннен шашу шашты.
Мұнда айтулы мерекеге орай, көпшілікке арнайы дастарқан жайылып, Наурыз көже таратылды. Келушілер алтыбақан теуіп, аула маңында орналасқан тарихи жәдігерлермен танысты.
Жамбыл облысы