Белсеніп шығып, бірліктің берекесін келтіріп, жақсы істерге ұйытқы болып жүрген жаны жайсаң жандарды көргенде қай көкіректе болсын үміт отының маздай лаулайтыны бар. Қай заманда болсын, ел болған соң көмекке зәру адамдардың да кездесері ақиқат. Ал ең сүйініштісі атымтай жомарттар одан да көп екен. Жалпақ әлемді тітіренткен жаман тұмаудың зұлмат хабары ел шетіне жеткенде ауданда еріктілер тобы шоқтай екшеліп, алдарына асқаралы міндет қойып, бірігіп, бірлесе түскен. Осы бір әдемі әрекет кейбір кеудедегі мұздаған жүректі жібітті, қолдан сусып шығып бара жатқан тіршіліктің түйіндерін бекемдеді.
Осыдан бір жарым жыл бұрын құрылған, ел ішіндегі еріктілерді топтастырған «Қайырымды істер» клубының жетекшісі Нурсаит Машанло еді. Жерлестерінің айтуына қарағанда, Нурсаит бойындағы бар күш-қуатын, ерік-жігерін осы бір іске жұмсаған. Ұйымдастыру қабілетінің молдығына орай, жанындағы жұртқа ізгілік шарапатын төге алатын адамдарды шоқтай екшеп алған. Жақсылық жайылмай, үлгі болмай, өнегесі өрістемей тұра ала ма? Еріктілердің елге тигізіп жатқан көмегінен құлақтанған, көздерімен көрген жерлестері де қол қусырып қарап тұра алмай, ортақ іске белсене жұмылған. Осылайша, шағын ғана ауданда қамқорлық жасаудан ләззат алатын, мұқтаж жандарды демеп, тілеу бола алғанын тіршілігінің мәні деп санайтын 200-ге жуық адам клуб мүшелері қатарына енді.
Еріктілер ауданда бірнеше мәрте акция өткізді. «Ардагерлерді ардақтайық», «Қолдан қолға», «Игі іс» тәрізді бастамалар аясында мұқтаж жандарға дәрі-дәрмектер жеткізіліп, дерттен қалай қорғану керектігі түсіндірілді. Қайырымдылықтан қариялар ғана емес, балалар да құр алақан қалған жоқ. Аудандағы білім ошақтары оқушыларының осы бір қиын кезде лайықты білім алуына қолғабыстарын тигізді. Биылғы қыс бойы жалғызілікті жандардың тізімі жасалып, қатал қыстан қысылмай шығуларына септіктерін тигізді. Уақтылы отын-шөптерін үйіп, қорадағы малына қарайласып, аулаларын тазалап беруді өз міндеттеріне алды. Наурыз мерекесінде белсенді топ мүшелері жергілікті атқарушы орган өкілдерімен бірлесе отырып, аудан жұртшылығын құттықтап, ақ түйенің қарны жарылған күні тамаша тарту жасады. Дәмі тіл үйіретін палау басып, бауырсақ пісіріп, халыққа ауыз тигізді.
– Ең бастысы, ел ішінің ынтымағы, – дейді клуб жетекшісі Нурсаит Машанло, – егер біз азық-түлік себеттерін жеткізіп, қолымыздан келгенінше қажетті бұйымдарын тауып беріп жатсақ, ел күнін көре алмай отыр деген сөз емес. Қазір аудан тұрғындары бақуатты, біз тек осы бір аз ғана көмегіміз арқылы бірлігімізді, ынтымағымызды бекемдей түскіміз келеді.
Еріктілердің еселі ісін көрген жерлестері де олардың ықылас-ниетіне дән разы. Жарық дүниеде жаныңдағы ізгі адамның жан шуағын сезініп жүргенге жетер не бар?!
Ақмола облысы,
Шортанды ауданы
