Еуропа Пасханы үйде тойлады

Әлем • 07 Сәуір, 2021

Еуропа Пасханы үйде тойлады

24 рет көрсетілді

Өткен аптада елімізде коронавирус инфекциясын жұқтырғандар санының ең үлкен статистикасы тіркелді. Сәуір басында пандемия басталғалы болмаған ең үлкен көрсеткіш 2000-нан астам науқас дертке шалдыққаны мәлім болды. Ал әлемде жаппай вакциналау басталса да, үшінші толқын көрсеткіштері жақсы емес. Сәуірдің басында Еуропада Пасха тойланады. Былтыр Рождествоны тойлай алмағандар, биыл да қасиетті мерекелердің бірін үйде қарсы алды.

Светлана ҒАЛЫМЖАНҚЫЗЫ

Еуропаның бірқатар мемлекеті үміт артқан AstraZeneca дайындаған вакцина қанның ұюына, артынша тіпті кісі өліміне алып келетіні анықталды. Сәйкесінше, аталған вакцинадан бас тартушылар саны артып жатыр. Осы ретте Еуропадағы бірнеше мемлекет жалпыұлттық карантин жариялап, азаматтарын үйде күтуге шақырды.

Жыл басында мектептер шектеулі адам санымен жұмыс істейтіні хабарланған еді. Алайда Франция үкіметі сәуірде мектептерді қайта жабуға шешім қабылдады. Сенбіде үкімет басшысы барлық мектеп пен сауда орындары, сонымен қатар дүкендер жұмысын тоқтататынын мәлімдеді. Үйден себепсіз он шақырымға алыстауға болмайды. Осылайша, француздар қасиетті Пасханы үйлерінде атап өтті.

Ел президенті Эммануель Макрон инфекциялық ауруханалар саны әлі де артатынын хабарлады. Соңғы статистикаға зер салсақ, Францияның 46 677 азаматы вирус жұқтырып, 304 адам қайтыс болған. Президент қатаң карантин жариялауға мәжбүрлік туындамас деген сенімін де жасырмады.

Германия президенті Штейнмайер халықты вакцина ектіруге шақырды. Сенбі күні халыққа арнаған жолдауында үшінші толқында шектеулер қатаңдатылуы мүмкін екенін ескертті. Ең маңыздысы – ол елдегі сенім деңгейіне қатысты өз ойын білдірді. «Иә, сынама кезінде қателіктер кетуі мүмкін. Дегенмен, пандемиядан құтылу әп-сәтте емес. Сондықтан да саяси дискуссияның себебі бар. Алайда құр талқылаулар еш нәтиже бермейді. Ол қай деңгейде – жергілікті не мемлекеттік, партиялық не коалициялық деңгейде болсын, негізгі, шешуші фактор еместігін ескеру керек. Біз халыққа бағыт беріп, прагматикалық шешім ұсынуымыз керек», деді мемлекет басшысы.

Канцлер Меркель сәуірдің басында мерекеге орай карантин жарияланады дегенімен, ресми хабар болмады.

Үшінші толқынды карантинмен бастаған тағы бір Еуропа елі – Италия. Мемлекет тұтастай «қызыл аймақта». Денсаулық сақтау ұйымдары күніне 20 мыңнан астам адамнан вирус табылатынын мәлімдеді.

Рим папасы Франциск биылғы Пасха мерекесімен құттықтауын бос шіркеуден жолдады. Жыл сайын жүз мыңдаған халық жиналатын Әулие Петр шіркеуі осы жылы тек 200 адам ғана қабылдауға рұқсат алды. Шіркеудегі мерекелік қызмет онлайн трансляция арқылы көрсетілді. Рим папасы жолдауында карантин талаптарын сақтап, мемлекет басшыларын індетке қарсы вакцина саясатын жолға қойып, реттеуін сұрады. Биылғы құттықтауда саяси мәселе де шет қалмады. Рим папасы мынадай елең-алаң кезде әскери қару-жарақ пен шиеленістерге ақша жұмсаудың қисынсыз екенін атап өтті. Одан кейін жексенбіде жыл сайынғы дәстүрлі жолдауында әлемдегі дағдарыстың өршіп жатқанын айта келе, денсаулыққа бей-жай қарамау керегін еске салды.

Еуропадағы жағдайды ДСҰ сынға алды. Халықаралық ұйым Еуропа вакцина мәселесіне немқұрайды қарап, жағдайды ушықтырып алды деген кінә тағады. ДСҰ-ның Еуропа бойынша директоры Ханс Клюг «Бұл пандемиядан құтқарар жалғыз жол – вакцина. Дегенмен, вакциналау қарқыны тым төмен. Үкіметтер бұған жауапкершілікпен қарап, азаматтарға оның маңызын түсіндіруі керек. Біздің қолымыздағы статистикаға қарасақ, аумақтағы 900 млн адамның тек 10 пайызы ғана вакцинаның алғашқы дозасын салдырған», деді.

Ал АҚШ кеше 4 млн-нан астам азаматының вакцина салдырғанын хабарлады. Осылайша, вакцина салдыру дерегі бойынша рекорд жаңартылған. Бұл туралы Ақүйдің Covid-19 ақпаратына жауапты доктор Сайрус Шафар әлеуметтік желіде жазды. АҚШ үкіметі бұған дейін күніне 3 млн адамға вакцина салып келген. «Егер адамдар маска тағып, бірнеше адам болып жиналуды доғарса, сонымен қатар вакцина салуды міндетті шара деп қабылдаса, АҚШ бұл пандемиядан тезірек құтылады», деді президент Байденнің пандемия бойынша кеңесшісі доктор Энтони Фаучи.

Күннің маңызды және өзекті жаңалықтарын «Егемен Қазақстан» телеграм каналынан оқыңыз