Өткен жылдардың тәжірибелері ескеріліп, су тасқынына неғұрлым бейім орындарда топтың жеке құрамын шоғырландыру жүргізілді. Олар Рузаевка және Чистополье селоларына жақын жердегі Ақан – Бұрлық, Шарық және Жембарақ өзендері. Сонымен қатар Ғ.Мүсірепов ауданынан өтетін Жембарақ және Есіл өзендерінің Тоқсан би селосы, Айыртау ауданының Константиновка селосының маңындағы Бабық-Бұрлық өзеншіктері. «Су тасқынына дайындық бұрын әзірленген іс-шаралар жоспарына сәйкес жүргізілуде. Біздің мақсатымыз - осы күрделі кезеңде жергілікті атқарушы органдарға көмек көрсету, елдімекендерді қауіпті стихиялық құбылыстардан қорғау. Өткен жылдың тәжірибесіне қарағанда біздің мамандарға мұз кесуге, жергілікті тұрғындарды, жүктер мен азық-түлікті мұз жүріп жатқан өзендер арқылы өткізуге тура келуі мүмкін», дейді Ғ.Мүсірепов атындағы ауданында жұмыс істейтін бөлімшені басқарушы,азаматтық қорғау подполковнигі Марат Сыздықов.
Бұл бөлімшелер аудандарда 7 сәуірден бастап жұмыс істеуде, ал бүгін, 12 сәуірде Уәлиханов ауданына да жеке құрамның 8 адамынан қосымша күштер мен құралдар, Кұлыкөл селосына қайықпен мотопомпалар артқан КамАЗ автомобилі жіберілді.
