Медицина • 13 Сәуір, 2021

Миға тамыр жолдары арқылы операция жасады

1627 рет
көрсетілді
2 мин
оқу үшін

Cоңғы жылдары Шымкенте медицина саласының дамуы қарқын ала бастады. Оның бір себебі қала республикалық мәртебе алып, денсаулық сақтау саласына қолдау арта түсті. Екіншіден, еліміздегі білікті де білімді медицина білгірлері шырайлы шаһарға келіп қызмет етуде. Мәселен, трансплантолог Абылай Дон­байдың өзі ТМД елдерінде сұранысқа ие маман екендігін басы ауырып, балтыры сыздаған жұрттың барлығы біледі.

Миға тамыр жолдары арқылы операция жасады

Жуырда шаһарға нейро­хирургия­ның майталманы Мыңжылқы Бер­діқожаев қо­ныс аударып, №2 қалалық аурухананың бас дәрігері қыз­метіне тағайындалған болатын. Білікті нейрохирург Мыңжылқы Бердіқожаев жаңа жұмыс орнында инсульт алып, жедел жәрдеммен ауру­­ханаға түскен 57 жастағы әйелге ота жасады.

«Науқас субарахноидальды қан құйылумен алғашқы аневризма-геморрагиялық ин­сультпен түскен. Оған мидың КТ-да-субарахноидты қан кету, КТ ангиография­сы жасалғанда – сол жақ іш­кі каротид артериясының ане­вриз­масы анықталды. Сон­­дықтан шұғыл түрде жаңа биплан ангиографында рент­генэндоваскулярлық әдіс­пен, яғни бас сүйегін ашпай ота жасалды. Ангио­графта КТ бақы­лау операция­сы жүргізілді», дейді нейрохирург.

Дәрігердің айтуынша, ота сәтті жасалып, қан кету көзі жойылған. Әрі қарай науқасқа емдеуді толық жүргізуге болады. Айта кетерлігі, өткен жылы қалалық ауруханаға соңғы үлгідегі ангеограф ап­параты алынған болатын. Бұрын басына қан құйылған науқасқа бас сүйегін ою ар­қылы ота жасалса, жаңа аппаратпен миға тамыр жолдары арқылы ота жасалатын болды.

Еске салар болсақ, Мың­жыл­қы Сайлауұлы еліміздегі нейрохирругия саласын дамытып, әлемді мойындатқан білікті дәрігер. Бүгінге дейін 5 мыңнан аса бас миының тамырларына жоғары техно­­логиялық әдіспен ота жа­саған. Науқастың қан тамыр­ларының ішіне ота жасап келе жатқанына 12 жылдан асты. Тіпті тума ауытқуы бол­ған сәбилердің де ми тамырларына сәтті операция жасап, сауықтырып шығарып келеді.