Қазіргі таңда тараптар өтемақының көлемі қанша болуы қажет екеніне келісе алмай жатыр. Мысыр тарапы оқиғадан келген шығынды 1 млрд долларға жуық сомаға бағалап отыр.
Өз кезегінде кеменің иесі жапониялық Shoei Kisen Kaisha салынған өтемақы мөлшерімен келіспейді. Әйтсе де, компания өкілі Руй Муракошидің айтуынша, қазіргі таңда Мысыр билігімен келіссөздер жалғасып жатыр.
Суец каналы әкімшілігі төрағасы Осама Рабидің айтуынша, өтемақы көлемі құтқару жұмыстарына, канал жағалауына келген зардапқа және әрлі-берлі өткен кемелерден түсетін қаражаттың тоқтап қалуына байланысты есептелген.
Жергілікті бұқаралық ақпарат құралдарына сүйенсек, Мысыр соты Ever Given-нің иесі өтемақыны толық төлемеген жағдайда кемені өздерінде алып қалуға шешім шығарған.
Естеріңізде болса, наурыз айының соңында Суэц каналында ірі жүк кемесі қайраңға шөгіп қалып, ең маңызды су жолының бірін бөгеп тастады. Бұл жағдай тіпті тауарларды жеткізу тізбегіндегі дағдарыстың күшею қаупін тудырған. 29 наурызда кеме қайраңнан босатылды. Сәуірдің басында Суэц каналындағы қозғалыс қалпына келді.
