Үкімет • 16 Сәуір, 2021

Асқар Мамин Кәсіпкерлік мәселелері жөніндегі жобалық офис отырысын өткізді

168 рет
көрсетілді
3 мин
оқу үшін

Премьер-Министр Асқар Мамин Кәсіпкерлік мәселелері жөніндегі жобалық офис отырысын өткізді, деп хабарлайды Egemen.kz Үкімет басшысының баспасөз қызметіне сілтеме жасап.

Асқар Мамин Кәсіпкерлік мәселелері жөніндегі жобалық офис отырысын өткізді

Жеңілдікті несие беру бағдарламаларының мониторингі және мемлекеттік қолдау шараларының тиімділігін бағалау туралы Премьер-Министрдің орынбасары Роман Скляр, мемлекеттік сатып алудағы, «Самұрық-Қазына» ҰӘҚ» АҚ және жер қойнауын пайдаланушылардың сатып алуларындағы жергілікті қамту, өңірлердің экономикалық картасын өзектендіру барысы мен микроқаржы ұйымдарын дамыту мәселелері туралы «Атамекен» ҰКП басқарма төрағасы Абылай Мырзахметов баяндады.

Қазіргі таңда Жобалық офис «Қарапайым заттар экономикасы», «Бизнестің жол картасы-2025», «Кең дала» жеңілдікті несие беру бағдарламаларының және «ҚазАгро» холдингінің басқа да қаржы құралдарының субъектілік мониторингін жүргізуде.

«Қарапайым заттар экономикасы» бағдарламасы бойынша бүгінде қаржыландырудың жалпы көлемінің 72%-ы іске асырылды — екінші деңгейдегі банктер 724,1 млрд теңге сомасына 2903 жобаны мақұлдады, 579,3 млрд теңге сомасына 2317 жоба субсидияланды. Мақұлданған жобаларды іске асырудың болжамды тиімділігі шамамен 22 мың жұмыс орнын ашуды көздейді.

Биылғы 13 сәуірде «Қарапайым заттар экономикасы» бағдарламасы аясында қолдауға жататын қызметтің басым түрлері мен тауарларды кеңейтуді, лизингтік компанияларды бағдарлама операторлары ретінде қосуды, қаржы институттары-бағдарлама операторларының меншікті капиталының ең төменгі мөлшері туралы талапты 60-тан 50 млрд теңгеге дейін төмендетуді көздейтін түзетулердің 7-топтамасы күшіне енді.

«Бизнестің жол картасы-2025» бағдарламасы бойынша да оң жүзеге асыру қарқыны байқалуда. Мәселен, осы жылдың қаңтар-ақпан айларында 88,2 млрд теңгеге 669 жоба субсидияланды (субсидия сомасы – 8,7 млрд теңге). Биылғы І тоқсанда 82,9 млрд теңгеге 6874 жобаға кепілдік берілді (кепілдік сомасы – 45,6 млрд теңге). «БЖК-2025» бағдарламасын жетілдіру аясында қарыздарды қайта қаржыландыру шарттары қайта қаралды — зардап шеккен салалардың тізбесі 174 қызмет түріне дейін кеңейтілді (+145 ЭҚЖЖ) және өтінімдерді қабылдау мерзімі 2021 жылғы 1 шілдеге дейін ұзартылды.

«ҚазАгро» холдингінің қаржы құралдары арқылы 2021 жылдың І тоқсанында 3757 жоба бойынша 106,8 млрд теңгеге несие берілді.

«Субсидиялау, кепілдендіру және жеңілдікпен несиелендіру құралдарының бизнеске қолжетімді болуы – аса маңызды мәселе. Біз кәсіпкерлердің "Қарапайым заттар экономикасына" деген қызығушылығын көріп отырмыз. Бағдарламаның барлық бағыттары бойынша облигациялар есебінен айналым қаражатын 100% толтыру мүмкіндігімен, кемінде 500 млрд теңге қорландыруды ескере отырып, аталған бағдарламаны 2022 жылдың соңына дейін ұзарту мәселесін қарастыру қажет», деді А. Мамин.

Үкімет басшысы реттелетін сатып алулардағы жергілікті қамтуды бақылауды, өңірлердің экономикалық картасын уақытылы әрі сапалы толтыруды, өндірістік қуаттарын жүктеу мақсатында отандық кәсіпорындарды паспорттауды аяқтауды, микроқаржы ұйымдарын құруды жеделдетуді және бизнес өтінімдерін қабылдау жұмысын бастауды тапсырды.

Ауыл шаруашылығы министрлігіне Бәсекелестікті қорғау және дамыту агенттігімен, Ұлттық экономика министрлігімен бірлесіп, «Қолдау» жүйесі арқылы АӨК-ті субсидиялау тетіктерін жетілдіру мәселелерін пысықтау тапсырылды.