Қоғам • 19 Сәуір, 2021

Көп қабатты тұрғын үйге сұраныс көбейді

740 рет
көрсетілді
5 мин
оқу үшін

Соңғы жылдары Шымкентте тұрғын үй құрылысы қарқын алып келеді. Соның дәлелі ретінде биыл шаһарда 1 млн шаршы метр тұрғын үйдің құрылыс жұмысы аяқталып, ел игілігіне берілмек. Бұл мегаполистегі баспана мәселесінің оңды шешім табуына негіз болмақ.

Көп қабатты тұрғын үйге сұраныс көбейді

Қаладағы «Асар», «Тұран» ша­ғын аудандарында және Арғынбеков көше­сінің бойында көп қабатты тұрғын үйлер бой көтеруде. Баспа­налардың құрылысын бірқатар ірі компания жүргізіп жатыр. Сала мамандарының айтуынша, бірінші кезекте сапаға мән беріліп, құрылыс жұмыстарын уақтылы аяқтау межеленген.

Шымкентте мемлекеттік бағдар­лама арқылы салынған су жаңа пәтерлерді беруде бірінші кезекте көп балалы отбасыларға басымдық берілуде. Күні кеше 100-ден астам көп балалы отбасы баспаналы болып, қоныс тойын тойлады. Тұрғын үй басқармасының басшысы Азамат Рысжановтың айтуынша, 2021 жыл­ғы I тоқсанның қорытындысы бо­йынша 2 796 (әр айда 932) азамат тұрғын үй кезегіне тіркелді. Шымкент қаласы бойынша тұрғын үй алу тізімінде 43 906 азамат бар.

Осы жылдың басында 976 отбасыны жалға берілетін пәтермен қамту жоспарланған болатын. Бүгінгі таңда жұмыс істейтін жастарға 300 пәтер бойынша тұрғын үй комис­сиясының шешімі қабылданып, пәтер­лердің кілттері беріліп жатыр. 1 сәуірде 161 пәтер бойынша тұрғын үй ко­миссиясының шешімі шықты. Бұл ретте жетім балаларға 10 пәтер, көп­ балалы отбасыларға 106 пәтер, халықтың әлеуметтік жағынан әлсіз тобына 45 пәтер беріледі. Комис­сияның келесі отырысы мамыр айында өтеді деп күтілуде.

2021 жылдың соңына дейін кезекте тұрған азаматтарды баспанамен қамтамасыз ету үшін 1 580 пәтер сатып алу жоспарланған. Пәтер сатып алуға 22,5 млрд теңге қаржы бөлінді. Нарықтағы жеке құрылыс салушылардың тізімі анықталып, талдау жұмыстары жүргізілуде.

Жыл соңына дейін кредиттік негізде 4 197 отбасыны пәтермен қамту көзделуде. 2021 жылы мамыр айында жергілікті бюджет есебінен бастапқы жарна үшін 300 млн теңгеге дейін (әр азаматқа 1 млн теңгеге дейін) тұрғын үй сертификаттарын беру жоспарланған.

Сонымен қатар 2021 жылы жер­гілікті бюджет есебінен бөлінген 6 млн теңгеге «Тұрғын үй сертифи­кат­тарын беру» мемлекеттік көр­се­тілетін қызметі автоматтанды­рыл­ды. Бұл қызмет бойынша азамат­тар­дың құжаттарын қабылдау – ақпарат­тық жүйенің www.kezekte.kz сайты арқылы жүзеге асырылатын болады. Бұл ретте тұрғын үйлерді үлестіру тек заң аясында, электронды кезекпен жүзеге аспақ.

Айта кетерлігі, шаһарда жергі­лікті құрылыс компаниялары да көп­ қабатты тұрғын үй салу жұ­мыс­тарына белсене атсалысуда. «Оңтүстік Құрылыс Сервис» ЖШС – өңірдегі сапалы тұрғын үй салу­мен айналысатын компания. Жуыр­да аталған компанияның шаһар орталығында тұрғызған «Бақыт» тұрғын үй кешені ел игілігіне берілді.

Құрылыс жұмыстары 2018 жылы басталып, нысан екі кезеңмен аяқталған. Алғашқы үйлер 2020 жылдың наурыз айында тапсырылса, екінші кезек осы жолы жүзеге асқан. Жалпы алғанда, 40 мыңнан астам шаршы метр тұрғын жай пайдалануға бе­рілді. Мұндай жоба биылдың өзін­де қаланың төрт жерінде жүзеге асып жатыр. Көп қабатты үйде 2-3 бөл­мелі бизнес кластағы пәтерлер бар.

«Бұл кешен құрамалы каркас тәсілімен соғылған. Үйге қажетті құрал­дар «Оңтүстік Құры­лыс Сервис» ЖШС-нің зауытында жа­сал­­ған. Бірін­ші кезеңде пәтерлерді толық бі­ті­ріп саттық. Екінші кезеңде әрлеу жұ­мыстарын пәтер иесіне қал­дыр­­дық. Үйдің сырты табиғи тас – тра­­вер­тинмен қапталған. Жеке кө­лік­­терге паркинг бар», дейді Оңтүс­тік Құрылыс Сервис» ЖШС қаржы директоры Гүлжан Сыдықова.

Пәтерлер 66-118 шаршы метр­ден. Әр кіреберісте лифт бар. Тұр­ғын­дардың жеке көліктеріне арна­йы паркинг жасалған. Бұл пәтер­лердің 70 пайызын Тұрғын үй жи­нақ банкінің салымшылары алды. Салымшылар құрылыс жұмыстары басталмай тұрып несие рәсімдеген. Осы арқылы баспанаға нарықтық бағадан төмен бағамен қол жеткізген.

«Отбасы банктің» Шымкент қала­лық филиалы директорының орынбасары Нұрлан Сұлтановтың айтуынша, заманауи үлгідегі көп қабатты үйдің құрылыс жұмыстары аяқ­талмай жатып пәтерлер сатылып кеткен. Демек, қалада сапалы көп ­қа­батты тұрғын үйлерге деген сұраныс арта түсуде деген сөз.

Айта кетерлігі, шымкенттік құрылыс компанияларынан бөлек, Bazis-A, Highvill, BI Group сынды жетекші компаниялар да Шымкент нарығына ене бастады. Әрине бұл өз кезегінде қаладағы пәтер тап­шы­лығын азайтуға, екіншіден, тұр­ғын үйлердің сапасын көтеруге мүм­кіндік бермек.

 

ШЫМКЕНТ