Әлем • 23 Сәуір, 2021

АҚШ климаттың жылынуына алаңдаулы

10 рет көрсетілді

АҚШ биыл өтетін климаттың жылынуы жөніндегі саммиттің алдында мәлімдеме жасап, әлем елдерінен 2030 жылға дейін парникті газдарды шығару көлемін 50 пайызға азайтуды сұрап отыр.

 

Ақ үй билігі климат дағдарысымен күресу үшін мұндай қадам қажетті деп есептейді. Осы аптада өтетін климат саммиті АҚШ президенті Джо Байденнің бастамасымен ұйымдастырылмақ. Іс-шара бейнеконференция режімінде өтеді. Осыған орай, Ақ үй АҚШ-тың 2030 жылға дейін парникті газдар көле­мін 2005 жылғы деңгейден 50 пайызға азайтатынын хабарлады.

Ақ үй әкімшілігінің қызметкері The Guardian газетіне берген сұхбатын­да АҚШ-тың бұған дейінгі президент­тің шешімдерінен бас тартатынын жеткізген. Сондай-ақ күтуге уақыт жоқ екенін, дәл қазір әрекет ету қажетіне екпін берген.

Айта кетерлігі, АҚШ-тың экс-прези­денті Дональд Трамп Париж келісімінен шығатынын мәлімдеген еді. Енді Джо Байден әкімшілігі бұрынғы басшының кемшілігін жуып-шайып, қайтадан халықаралық қоғамдастықтың сенімін иеленуді көздейді.

Ақ үй бүгінге дейін Канаданың, Аргентинаның, Жапонияның парник­ті газдар шығару көлемін азайту­ға көмектескенін айтады. Сондай-ақ Ұлы­британия секілді басқа елдерге қол­ұшын созуға әзір.

Әлемдегі көміртегі газын шығару бойынша ең бірінші орында тұрған Қытай бұл шешімге күмәнмен қарайды. Әйтсе де, ел басшысы Си Цзиньпин климаттың жылынуы жөніндегі саммитке қатысады.

БҰҰ Бас хатшысы Антонио Гутер­риштің айтуынша, АҚШ-тың пар­никті газ­дарды 50 пайызға төмендетуі плане­та­ның климат дағдарысына ұшы­­рауын тоқ­татуы қажет. Ғалымдар әлем 2030 жыл­ға қарай шығарындыларды екі есе­ге азайтуы керегін ескертіп отыр.

 

Соңғы жаңалықтар

Арақ сатылмайтын аудан

Аймақтар • Кеше

Ерлікке толы суреттер

Руханият • Кеше

Ұқсас жаңалықтар