«АтырауИнжСтрой» ЖШС баспасөз қызметінің ақпаратына сүйенсек, мұндай қадамға баруға Атырау қаласындағы кеңейтілетін жол бойындағы ағаштардың жұмысты атқаруға кедергі келтіргені себеп болған.
«Жобаға сәйкес, ағаштар кесілуі тиіс еді. Бірақ, жобаның тапсырыс берушісі мен мердігер компанияның бірлескен ұйғарымымен көпжылдық ағаштарды басқа жерге көшіру туралы шешім қабылданды», деп хабарлады кәсіпорынның баспасөз қызметі.
Жақында мердігер 38 ағашты тамырымен «Мұнайшы» стадионы маңындағы аллеяға көшірді. Ал, қаланы көгалдандыратын «КДМС» компаниясының мамандары «қоныс аударған» ағаштарды бақылауға алғалы отыр.
«Ағаштар жаңа орынға бейімделгенге дейін «ауырады». Бірақ, тыңайтқыштар мен суару ағаштардың тамыр жаюына ықпал етеді. Бір айда ағаштың тамырын жайғаны немесе өліп қалғаны белгілі болады», деп мәлімдеді «АтырауИнжСтрой» баспасөз қызметінен.
