Бизнес және қаржы саласында аналитика жасаумен айналысатын Finprom аймақтар арасында цифрлы сауаттылық бойынша айырмашылық жер мен көктей деп жазады. Төрт облыстың цифрлы сауаттылығы жоспарланған межеге де жетпей қалған. Дегенмен жалпылама алғанда өсу бар. «Цифрлы Қазақстан» мемлекеттік бағдарламасының басты міндеті 2022 жылы халықтың цифрлы сауаттылығын 83 пайызға жеткізу болатын. 2020 жылы 6-74 жас аралығындағы азаматтардың сауаттылығы 84,1 пайызға жеткен. Ал төмен нәтиже көрсеткен өңірлер – Ақмола (74,9 пайыз), Солтүстік Қазақстан, Батыс Қазақстан (78,8 пайыз) және Маңғыстау облыстары (79,6 пайыз). Өзге өңірлердегі цифрлы сауаттылық деңгейі 80,9 пайыз бен 91,4 пайыз аралығында.
Әрине, цифрлы сауаттылық даму үшін де интернетке қолжетімділік керек. Цифрлы даму, инновация және аэроғарыш өнеркәсібі министрі Бағдат Мусиннің айтуынша, DigitEL ұлттық жобасы қазақстандықтарды интернетпен 100 пайыз қамтып қана қоймай, IT салаға келетін инвестиция көлемін де арттырады.
«DigitEL ұлттық жобасы бес бағыт бойынша 200 шараны қарастырады. 2021-2025 жылдары жобаның жүзеге асу нәтижесінде халықты интернетпен, денсаулықтың электронды паспортымен 100 пайыз қамту, IT салаға келетін инвестицияны жылына 500 млрд теңгеге, IT өнімдер мен қызметтерінің экспорт көлемін 500 млн долларға, электронды өнеркәсіп өндірісі көлемін 90 млрд теңгеге дейін арттырып, 100 мың жұмыс орнын құрып, өңірлерде 5 IT мектеп ашу көзделген» деген еді министр.
