Абай атындағы Қазақ Ұлттық академиялық опера және балет театрының сахнасында «Қазақстан Камератасы» мемлекеттік классикалық музыка ансамблінің және «Құрманғазы» оркестрінің қатысуымен, Опера группасының және театрдың симфониялық оркестрінің жетекші солистерінің мерекелік концерті өтті. Театр сахнасынан Олжас Сүлейменовтың өлеңдеріне бірқатар вокалдық шығармалар орындалды.
Қазақ ұлттық театрының бай репертуарында Зауырбек Райбаевтың қойылымындағы Тимур Мыңбаевтың музыкасына қойылған «Фрески» балет спектаклі бар. Либреттосы біздің заманымызға дейін аңыздар мен дастандар түрінде жеткен алыс тарихи оқиғалар туралы поэтикалық баяндалатын Олжас Сүлейменовтің «Қыш кітап» атты айтулы шығармасының негізінде жазылған. Балетмейстердің өзі жазған либреттода IV-VI ғасырларда Қазақстан территориясын мекендеген ежелгі скифтердің тарихы, өмірі, тұрмысы көрсетілген.
Олжас Сүлейменовтің шығармашылығы шексіз. Ерен еңбегінің арқасында жазушының шығармалары ғаламға танылды, ақынның сценарийлері бойынша «Земля Отцов», «Синий маршрут», «Зима – не полевой сезон», «Примите Адама», «Последний переход» көркем фильмдері жарық көріп, қазақ кинематографиясы бүкіл әлемге танымал болды.
Ақынның шығармашылығы «екі әлемнің шекарасын» – Еуропа мен Азияны ұштастырады. Олжас Сүлейменовтың творчествосы – тарих пен мәдениеттің таңғажайып тілдік байлығымен үйлесуі, оның пайымдауларында ұлттық әдебиет пен мәдениеттің тағдыры, Қазақстанның әлемдегі орны, саясат пен лингвистика, тілдің, әдебиеттің және қоғамның дамуы туралы ой жүгірту сияқты кең ауқымды мәселелер қозғалады.
