Сайыс барысында мергендігімен көзге түсіп, жеңімпаз болған өренге «Алтын сақа» сыйлығын республикалық Асық ату федерациясының вице-президенті Жомарт Сабыржанов табыс етті.
Аталған жарысқа еліміздің әр қиырынан жас шамалары 13-14-тегі 50 оқушы қатысқан болатын. Ал Қарағанды облысының намысын алты оқушы қорғады.
«Алтын сақа» иегері Нұрдәулет Есімов Абай ауданына қарасты Құлайғыр ауылындағы «Топар» жалпы білім беретін мектебінің 8-ші сыныбында оқиды. Асық ату спортымен ол сегіз жасынан бері айналысады екен. Аталған білім мекемесінде дене шынықтыру пәнінен сабақ беретін Нұрлан Рахметов жас спортшының жаттығудан қалмайтын тәртіпті, айтқанды екі еткізбейтін елгезек және ерен еңбекқор екенін айтады.
Бұл жеңіс Нұрдәулетке кездейсоқ келген жоқ. Ол бұған дейін де асық атудан аудандық және облыстық жарыстарда топ жарып жүрген тәжірибелі ойыншы болатын.
Қарағанды облысы
