Осы әлемдік додадан кейін Халықаралық дзюдо қауымдастығы дзюдошыларға тиісті ұпайларын таратып, әлемдік рейтинг арқылы Олимпиадаға жолдама алған балуандардың тізімін жариялайды.
Дүниежүзілік жарыстың қарсаңында дзюдошыларымыздың олимпиадалық рейтингіндегі орындары қандай? Төртжылдықтың басты додасында ел намысын қанша балуан қорғауы мүмкін? Осы сұрақтарға жауап іздеп көрсек.
Дзюдодан ерлер құрамасының бас бапкері Ғалымжан Жылгелдиев 60 кило салмақ дәрежесінде сынға түсіп жүрген Елдос Сметовтің Олимпия ойындарына баратынын айтқан болатын. Иә, Елдостың дәл қазіргі таңда Токиоға баратынына талас жоқ. Осы аптаның басында жаңартылған Олимпиадалық рейтингте Елдос төртінші сатыда да тұр. Алғашқы үштікте екі жапон балуаны және бір ресейлік балуан бар.
66 кило салмақта екі бірдей мықты балуанымыз бар. Бірі – әлем чемпионатының күміс жүлдегері Ерлан Серікжанов, екіншісі – көптеген халықаралық жарыста топ жарып жүрген Елдос Жұмаханов. Екі балуан да ел намысын қорғауға лайық. Дегенмен Олимпиадаға бір ғана балуанның баратынын ескерсек, бұл жерде Ерлан Серікжановтың шоқтығы биік тұр. Ол олимпиадалық рейтингте 3831 ұпаймен 13-орында. Ал Елдос Жұмаханов 2787 ұпаймен 23-орында. Алайда бір қызығы, әлем чемпионатына Елдос барады. Егер ол финалға шығып жатса, Серікжановтың алдына түседі. Өйткені күміс жүлдегерге рейтинг бойынша 1044 ұпай, ал чемпионға 2000 ұпай беріледі.
Елдостың Олимпиадаға бару-бармауы өз қолында.
73 килодағы Жансай Смағұлов жыл басында Олимпиадаға баратын балуандардың ең соңғысы болып тұрған. Бірақ Дохада (Қатар) өткен «Шеберлер» бәсекесінде үздік бестікке кіріп, Ташкенттегі Гран Слам жарысында күміс жүлдеге ие болған балуанымыз бірден 12-орынға көтерілді. Дегенмен соңғы жарыстарда Жансайдың жолы болмады. Қазір ол 16-орында. Бірақ бұл – Олимпиадаға баруға жеткілікті орын. Енді осы нәтижеден төмендемеуі қажет.
81 килода үміт артып отырған балуандарымыздың бірі – Дидар Хамза. 2018 жылы жазғы Азия ойындарының чемпионы болған Дидардың, өкінішке қарай, соңғы кездері жолы болмай жүр. Қазір ол Олимпиадаға баратын балуандардың арасында жоқ. Осыдан бір ай бұрын құрлықтық квота арқылы баратындардың тізімінде еді. Қазір одан да шығып қалған – 32-орын.
90 кило салмақта күресетін Ислам Бозбаевтың да жағдайы мәз емес. Осыдан бірнеше ай бұрын Олимпиадаға баратын 18 балуанның ішінде (16-орын) еді. Қазір 24-орында. Яғни онда тек құрлықтық квота ғана бар. Әлем чемпионаты – оның соңғы мүмкіндігі. Егер алғашқы айналымнан сүрінетін болса, онда амалсыз Олимпиаданы теледидардан тамашалайды.
Өкінішке қарай, 100 килодағы балуандарымыздың бағы жанбай қойды. Ел намысын қорғап жүрген Айбек Серікбаев – 50-орында. Виктор Демьяненко 70-ші орында тұр. Бұл екі балуан үшін Токионың есігі тарс жабылған. Содан да болар, әлем чемпионатында екі балуанымыз да күреспейді.
100 килодан жоғары салмақтағы Ерасыл Қажыбаев Олимпиадалық рейтингте 35-орында. Жолдама алу үшін Ерасылға біраз еңбектену керек.
Қыздар құрамасының бапкерлері Олимпиада және әлем чемпионатының қола жүлдегері Отгонцецег Галбадрахқа сенім артып отыр. Қатысқан жарысынан кемі қола медаль алып қайтатын балуанымыз 3353 ұпаймен 14-орында. Галбадрах биыл ешбір жарысқа қатыспады.
Десе де, бұған дейінгі жинаған ұпайының көптігінің арқасында Олимпиадаға баратын мүмкіндігін сақтап тұр.
Қорыта келгенде, дәл қазіргі таңда Қазақстан құрамасында 5 салмақ дәрежесі бойынша
(4 ерлер, 1 қыздар) жолдама бар. Алтыншы жолдаманы аламыз ба, бесеуден төртеуге түсіп қаламыз ба, оны әлем чемпионатынан кейін білетін боламыз.
