Әлем біріншілігінің төртінші күнінде А тобының екі ойыны, В тобының екі кездесуі өтті. А тобында Словакия және Швейцария құрамасымен бірге көш бастап тұрған Ресей хоккейшілері жеңісті жолын жалғастыра алмады. Словакиямен мұзайдында жолыққан солтүстіктегі көршілеріміз 1:3 есебімен жеңіліп қалды. Екі құрама арасындағы матчтың алғашқы кезеңінде есеп ашылмады. Екінші кезеңде есепті бірінші болып Словакия ашты. 30-минутта шабуылшы Милош Келемен мергендігімен көзге түсіп, құрамасын алға шығарса, Ресей хоккейшілері бұл голға жылдам жауап берді. 31-минутта Александр Барабанов таразы басын теңестіріп кетті. Үшінші кезеңде Словакия құрамасы бес минуттың ішінде екі шайба соғып, жеңісті қарсыластарынан жұлып алды. 53-минутта Мартин Гернат сан басымдығын тиімді пайдаланса, 58-минутта Марек Дялога бос қақпаны дәл көздеді.
Осылайша, маңызды үш ұпайынан айырылған Ресей құрамасы үшінші турдан кейін турнир кестесінде екінші орынға сырғыды. Ал қатарынан үш матчта жеңіске жеткен Словакия 9 ұпаймен жеке-дара көш бастады.
Сонымен қатар өткен турда Швеция құрамасынан басым түскен Беларусь хоккейшілері бұл жолы Чехиядан овертаймда ұтылды. Кездесудің алғашқы кезеңінде тең ойнаған құрамалар екінші кезеңде үш шайба соқты. 25-минутта Беларусь ойыншысы Егор Шарангович есеп ашса, кезең соңына дейін Чехия құрамасы екі гол соғып, есепте алға шықты. Гол авторлары – Ян Коварж пен Филип Задина. Үшінші кезеңде Владислав Еременко таразы басын теңестіріп, ойын овертаймға ұласты. Қосымша уақытта Александр Алексеев мергендік танытып, Чехия құрамасына әлем чемпионатындағы алғашқы жеңісті сыйлады. Есеп – 3:2.
В тобындағы ойындарға тоқталар болсақ, Италия құрамасын қабылдаған Латвия қарсыластарының қақпасына жауапсыз үш шайба соғып, кезекті жеңісіне қол жеткізді. Бұл ойында Латвия құрамасы сапынан Мартиньш Карсумс екі мәрте мергендігімен көзге түссе, Лаурис Дарзиньш үшінші голдың авторы атанды.
Чемпионатты өте сәтсіз бастаған Үйеңкі жапырақтар елінің хоккейшілері үшінші турда да жеңілістің кермек дәмін татуға мәжбүр болды. Екі турдан бері қарсыластарын қоғадай жапырып келе жатқан Германия үшінші турда Канададан айласын асырып кетті. Есеп – 3:1. Германия бұл жеңісінен кейін В тобының турнир кестесінде 9 ұпаймен көш бастады.
