Әкімшілік жауапкершілікке тартылған ата-аналарға 29 170 теңге көлемінде айыппұл салынған. Бұл туралы Түркістан облысының білім саласында сапаны қамтамасыз ету департаменті басшысының орынбасары Құдайберген Шербаев брифингте мәлімдеді.
«Білім және ғылым министрлігі жыл сайын 1-12 маусым аралығында «Балалар еңбегін пайдалануға қарсы 12 күн» Ұлттық ақпараттық науқанын өткізеді. Мақсаты – балалар еңбегін пайдаланудың алдын алу мәселесіне қоғамның назарын аудару. Өңірде бұл бағытта тиісті шаралар қолға алынады. Білім ұяларындағы бала құқығын қорғау – департаменттің назарында», деді Құдайберген Қайыпбекұлы.
Негізінен департамент тарапынан «Бала қорғау» тобы жұмыс істеп жатыр. Апта сайынғы мониторинг нәтижесінде өткен аптада арнайы чатқа 63 сұрақ келіп түскен. Аталған мәселелерді оңтайлы шешу бойынша тиісті шешімдер қабылданды.
