Саябақ – елорда тұрғындары мен қала қонақтарының сүйікті демалыс орнының бірі. Музей ғимаратының жанында балалар ойнайтын жаңа заманауи алаңдар, сахна алаңы, Workout алаңы, 3 стритбол алаңы бар. Олардың салынуына Нұрсұлтан Назарбаев қоры мұрындық болған.
Нысандардың ашылу құрметіне орай арнайы мерекелік бағдарлама өтті. Шығармашылық топтардың, аниматорлардың қатысуымен би мен ойын-сауық ойындары ұйымдастырылды.
Нұрсұлтан Назарбаев қорының директоры Дариға Назарбаева, Nur Otan партиясы Төрағасының бірінші орынбасары Бауыржан Байбек жаңа демалыс орындарын аралады. Тұрғындар мен қала қонақтары олармен дидарласып, әдемі әсерлерімен бөлісті.
– Бұл өте жайлы жер екен. Ұзақ серуендей бергің келеді. Балалар да көңілді. Мұндағы ерекше субұрқақтар мен ойын алаңдары адамды өзіне баурайды, – дейді қала тұрғыны Айнұр Жақыпова.
Ал алыстан ат терлетіп келген Ләззат Аманбаева болса, астананың күннен-күнге осылай көркейіп келе жатқанына дән риза.
«Қарағандыдан әпкеме қонаққа келгенмін, ол осында серуендеуді ұсынды. Бұл жер маған ұнады. Мұнда бәрі ыңғайлы әрі әдемі. Әртүрлі алаңы бар саябақ балаларға да, спортсүйер қауымға да, қарттарға да ұнайды деп ойлаймын», дейді Л.Аманбаева.
Бүгінде саябақ салудың бірінші кезеңі аяқталды. Балалар мен ересектердің бос уақытын тиімді өткізуіне барлық жағдай бар. Әлі де абаттандыру жұмыстары жалғасады. Екінші кезеңде ағаш отырғызу жоспарланған, арнайы вело және жарыс жолы жасалады. Қыс мезгілінде аумақта мұз айдыны мен шаңғы трассасы пайда болады.
