Әрине, Айбардың бұл әрекетін қолдаушылар да, оны бағалаушылар да көп болды. Әуелгі қолдаушылары әкесі Тұрғанбай Ержанов пен анасы Күнбала Ермекова екен. «Анам менің нағашыларымның өте мықты кісілер болғанын айтады. Әкем де, анам да еңбекқор адамдар. Әкем қара күш жағынан мықты кісі», дейді спортшының өзі.
Дейтұрғанмен, Айбар бірінші кезекте мұны мақтаныш немесе елге танылу үшін емес, қазақтың қайсарлығын насихаттау үшін қолға алыпты. Әрі биыл әйгілі Қажымұқан Мұңайтпасұлының туғанына 150 жыл толуына орай көлік тартуды ұйымдастыруда. Сарысу ауданы Саудакент ауылында қарапайым отбасында тәрбиеленген Айбар бала күнінен спортшы болуды армандапты. Уақыт өте келе ол белестерді бағындырып, спорт әлемінде бірқатар жетістікке жеткен. Жерлесіміз пауэрлифтингтің 8 түрінен спорт шебері атанған. Мәселен, 2017 жылы «Классикалық жатып сығымдаудан Қазақстан Республикасының спорт шебері», 2018 жылы «Қазақстан Республикасының спорт шебері», 2019 жылы «Әскери жатып сығымдаудан Қазақстан Республикасының спорт шебері» атақтарына және өзге де марапаттарға қол жеткізген. «Қазіргі уақытта бұл спорт түрі шет мемлекеттерде көп таралған. Біздің елімізде санаулы жігіттер ғана ауыр жүк көліктерін тартып жүр. Осыдан екі жыл бұрын көлік сүйреу туралы ойыма келген. Алайда әлемді жайлаған індетке байланысты біраз дайындықтар шегеріліп қалды. Бірақ бұл шаруаға физикалық тұрғыдан дайын едім. Осы жылдың басында қайтадан дайындала бастадым», дейді Айбар Ержанов. Нәтижесінде, салмағы ондаған тонна болатын ауыр көліктерді кедергісіз тартып, күш-қуатын тағы да дәлелдеді.
Қазақ жастарын отансүйгіштікке баулу мақсатында ауыр спорт түрімен айналысып жүрген Айбар бүгінде жанына шәкірт жинап, білгенімен бөлісіп келеді. Жанындағы Бауыржан Камалиев, Ержан Жақаев, Серік Сеңгірбаев сияқты жігіттермен бірге әлі талай жетістіктерге жетуді жоспарлауда. Жол талғамайтын көліктерді де, ауыр жүк көлігін де жалғыз сүйреген Айбар енді алдағы уақытта пойыз вагонын тартуды да көздеп отыр. Бұл да уақытында көпшіліктің таңданысын тудырып, қызығушылығын арттыратын оқиға болатыны сөзсіз.
Жамбыл облысы
