Спорт • 02 Маусым, 2021

Ардагерлер атой салды

348 рет
көрсетілді
1 мин
оқу үшін

Ресейдің Санкт-Петербург қала­сында волейболдан ардагерлер арасында өткен халықаралық турнир өз мә­ресіне жетті. Бұл жарыста елі­міздің «Алматы» клубы да бақ сынады.

Ардагерлер  атой салды

Осыдан екі апта бұрын ғана Қазақ ұлттық аграрлық университеті (ҚазҰАУ) негізінде құрылған аталған команда Мәскеудің дәл іргесінде орналасқан Зеленоград қаласында КСРО-ның еңбек сіңірген жаттықтырушысы Александр Кильчевскийді еске түсіруге арналған турнирде топ жарғаны жайында жазған едік. Міне, енді олар тағы да атой салды. Нева жағалауында өткен жарыста «Алматының» сапында Игорь Чекрусков, Бақытжан Байтөре, Владимир Банников, Рустам Мәсімов, Шохрат Арзиев, Алек­сандр Тарасов, Вячеслав Козуб, Амра Шал­барбаев және Елдар Газизулин сынды ойыншылар өнер көрсетті. Бастапқы бәсекелердің барлығын өз пайдасына шешкен жерлестеріміз ақтық сында Кострома облысының өкілдерімен кездесті. Ал бұл команда кезінде ардагерлер Олимпиадасында топ жарып, әлем чемпионы атанған. Осындай азулы қарсыластарынан еш қай­мықпаған қазақстандық волейболшылар 2:0 есебімен басым түсіп, бас жүлдені олжалады.