Жаңбырлатып жүгері өсіруді «РЗА» шаруа қожалығы бастап отыр. Ол үшін алдымен шетелдік жаңбырлатып суару жүйесін орнатты. Спринкерлік жүйе бойынша 2 метр тереңдікке дренажды құбыр жүргізілген. Ол шайылған тұзды суды егістіктен шығарады және жерасты суларының көтерілуіне кедергі болады.
«Бір сағатта 1 шаршы метрге 8 литр су кетеді. Бір жағы суды үнемдеу, тұзды жуу үшін 24 сағат суардық. Тыңайтқыш, аммофос, гербицидін, 400 тоннадай мал қиын төктік. Соқамен жыртып, тегістеп, тырмалап жүйеге келтіріп, дайындадық. Әр гектарынан 450 центнер өнім алсақ деп отырмыз. Таңертең және кешкілік суарылып, әбден бапталған мал азығы 1200 бас сиыр өсірілетін тауарлы сүт фермасына беріледі», дейді шаруа қожалығының төрғасы Жеңіс Қарабалаев.
Аудандық ауыл шаруашылығы бөлімі басшысының орынбасары Сапарбек Қуатов су тапшылығына байланысты егіс көлемін қысқартып отырғандарын айтады. Аудан бойынша биыл 17685 гектарға дақыл егу жоспарланған, оның 6637 гектары күріш.
Тамыздың соңында жүгері орылып алынады. Орнына қара бидай дәні себіледі. Оның өнімі ерте көктемде жиналады. Осылайша, әртараптандыру бағыттары жүзеге асырылмақ.
