Спорт • 15 Маусым, 2021

Атың барда ел таны, желіп жүріп...

559 рет
көрсетілді
1 мин
оқу үшін

Ел Тәуелсіздігінің 30 жыл­дығына орай Ұлттық ат туризмі федерациясының ұйым­дастыруымен тарих тылсымын тануға бағыт­талған тұңғыш экспедиция ұйымдастырылды.

Атың барда ел таны, желіп жүріп...

Ауыздығымен алысып, жұ­тынып тұрған сәйгүліктерге ер салынып, керек-жарақ дүние қан­жығаға байланды. Тарих тылсымына бойлауға құлшынғандар Целиноград ауданының аума­ғын­дағы ежелгі Бозоқ қаласы ма­ңында атқа қонды. Сөз арасында Бозоқ қаласының Ұлы Жібек жолындағы қыпшақ билеушілерінің әскери ордасы болғанын айта кетелік. Тарихшылардың таразылауына қарағанда, қаланың гүлденуі түркі жұртының ішінде қыпшақтардың беделі көтерілген Х-ХІ ғасырларға сәйкес келеді.

Ежелгі қаладан атқа қонған экспедицияға Мәдениет және спорт министрлігі, Ұлттық музей, Ақ­мола облысының әкімдігі, Ботай қорық-музейі қолдау көр­сетіп отыр.

Тұңғыш рет айшылық алыс жолға аттанған экспедиция Нұр-Сұлтан-Жидебай бағытында мың шақырымдық жолды желе жор­тып өтпек. Жай ғана жүріс емес, ежелгі тарих соқпағында ел есінде сақталған тірі аңыз, тір­­шілік сұл­басын сүзу мақсат етілуде. Жол-жөнекей Павлодар, Қа­ра­ған­ды, Шығыс Қазақстан облы­сы аумақтарындағы Олжабай ба­тыр, Едіге би, Мәшһүр-Жү­сіп Көпейұлы, Бұқар жырау, Абай-Шәкәрім кесенелерін аралап, Қоян­ды жәрмеңкесі өткен орында ат шалдырып, ілгері ас­пақ.

Экспедиция құрамында бір­неше облыстың өкілдері, негізінде тарихшылар мен журналистер бар. Негізгі мақсат – халқымыздың сан ғасыр бой жалғасып келе жатқан дәс­түрлерін насихаттау, киелі жер­лер­ге құрмет көрсету. Сол ар­қылы ел назарын өзекті мәсе­ле­лерге аудару.

 

Ақмола облысы