Аймақтар • 16 Маусым, 2021

Елордада эпидемиялық ахуал оңалмай тұр

7 рет көрсетілді

Бүгінде еліміздегі эпидемиялық ахуал біршама тұрақталып, өткен аптада коронавирус жұқтырудың анықталған жағдайы 16 пайызға азайды. Жалпы, республика 6 маусымнан бері «жасыл аймақта» тұр. «Қызыл аймақта» Нұр-Сұлтан қаласы ғана қалды. Елордағы ахуал әлі де оңалмай, өткен аптамен салыстырғанда науқастану өсімі 7 пайызға артты.

15 маусымда жарияланған Қазақстан өңірлеріндегі эпидемиялық ахуалды бағалау матрицасы бойынша, «қызыл аймақта» Нұр-Сұлтан қаласы, «сары аймақта» Атырау, Батыс Қазақстан және Қарағанды облыстары тұр. Ал «жасыл аймақта» – Алматы, Шымкент қалалары, Ақмола, Алматы, Ақтөбе, Жамбыл, Қостанай, Қызылорда, Маңғыстау, Шығыс Қазақстан, Павлодар, Солтүстік Қазақстан және Түркістан облыстары. Бұдан бір күн бұрын ғана «сарғайып» тұрған Ақмола облысында жағдай дұрысталып, «жасылға» көшті.

Сондай-ақ Қазақстанда бірінші компонентпен 2 547 363 адам, екінші компонентпен 1 435 334 адам вакцина салдырды. «Қызыл аймақта» қалып отырған елордада вакциналау қарқыны әлі де бәсең. Соңғы мәлімет бойынша бірінші компонент бойынша Нұр-Сұлтан қаласында 176 мыңнан аса адам екпе алды.

Дегенмен, астанадағы асқынған жағдай­дың оңалуына осы вакциналау әсер етіп жа­тыр. Өйткені қалада карантин және оқшау­лау режімін бұзған жағдайлар әлі де азаяр емес. Бұл ретте елорда әкімі Алтай Көлгіновтің жетекшілігімен Нұр-Сұлтан қаласы әкімдігінің қалалық штабының отырысында коронавирус инфекциясы таралуының алдын алу мәселелері қаралды. Енді сақтық шараларын талапқа сәйкес ұстамаған қала тұрғындары жауапкершілікке тартылып, айыппұл сомасы шамамен 90 мың теңгені (30 АЕК) құрайды.

Бүгінгі таңда, Ashyq жобасына қатысатын кәсіпкерлік нысандары арқылы үй карантинін бұзған 3 550 адам анықталды. Олардың ішінде «қызыл мәртебесі» бар, яғни Сovid-19 жұқтырған 1 651 келуші, «сары мәртебесі» бар 1 899 адам анықталды.

Карантин шараларын сақтау бойынша мониторинг топтарына жұмысты күшейту тапсырылды. Сонымен қатар мобильді топтар Ashyq жобасына қатысатын кәсіпкерлік нысандарының жұмысын тексереді. Яғни келушілердің мәртебесі тексерілетіні, са­нитарлық нормалардың сақталатыны, бел­гіленген уақыт режімі бұзылмайтыны және басқа да талап қатаң қадағаланады. Ка­ран­тин шаралары бұзылған және сақтал­маған жағ­дайда нысандар жабылады.

«Тұрғындар өз жауапсыздығынан жақын­дарына қауіпті індетті жұқтыруы мүм­кін екенін ескермейді. Олардың ағзасы коронавирусты жеңе алатынына кепілдік жоқ. Сондықтан біз қатаң шаралар қабылдауға мәжбүрміз. Мұның бәрі қала тұрғындары мен елордамыздың қауіпсіздігі үшін жасалып жатыр. Коронавирус көрсеткіші азайып жатқанына қарамастан, қала әлі де «қызыл аймақта». Сырқаттанушылықтың төмендеуі вакциналау есебінен жүріп жатыр. Вакциналанғандардың санын көбейтіп, ұжымдық иммунитетті қалыптастыра отырып, біз коронавирусты жеңе аламыз», деді Нұр-Сұлтанның бас мемлекеттік санитарлық дәрігері Сарқат Бейсенова.

 

Соңғы жаңалықтар

Техникалық реттеудің цифрлы тетігі

Технология • Бүгін, 08:34

Ғарыштан анықталған қоқыстар

Экология • Бүгін, 08:24

Вирус жұқтыру тоқтамай тұр

Коронавирус • Бүгін, 08:16

Өрт сөндірген өжеттер

Аймақтар • Бүгін, 08:12

Ерлікке бергісіз еңбек

Қоғам • Бүгін, 08:09

Жасанды жүрек салынды

Әлем • Бүгін, 08:02

Ұқсас жаңалықтар