Экология • 17 Маусым, 2021

«Сары» түтіннің салдары

236 рет көрсетілді

Облыстық экология департа­менті екі ай бұрын «Теңіз» кені­шінде шыққан «сары» тү­тінге қатысты тексерісті аяқ­тап, әкімшілік іс қозғады. Департамент басшысы Әлібек Бекмұхаметовтің ақпаратына сүйенсек, биылғы 7 сәуірде «сары» түтін кен орнындағы КТЛ-2 нысанында орнатылған «У-500» қондырғысының гидро­генизациялау пешінен шық­қаны анықталыпты.

– Тексеру кезінде қалдық газды беру клапанының ақауынан «С-511» пешінің жұмысы тоқтағаны белгілі болды. Сол себептен, ауа­ға «сары» түтін түріндегі кү­кірт шығарылған. Департамент бас­шылығының ұйға­рымымен осындай ағаттыққа жол бергені үшін «Теңізшевройл» ЖШС-не қатысты əкімшілік іс қоз­­ғалып, бұзушылықтарды жою тура­лы нұсқама берілді. Онда қор­шаған ортаға өз бетінше эмис­сия­ларға жол бермеу жөнінде нақты іс-шараларды əзірлеу, сондай-ақ штаттан тыс жағдайлар кезінде қондырғылар желісінің жұмысын тоқтату мүмкіндігін қарастыру ұсы­нылды, – дейді департамент басшысы Ә.Бекмұхаметов.

Оның айтуынша, қазір әкімшілік істі қарау процесі уақытша тоқ­татылыпты. Өйткені компания бас­шылары тексеру нəтижелері бойынша толтырылған акт пен жол­­данған нұсқамаға байланысты эколо­гиялық реттеу жəне бақылау комитетіне шағымданып отыр. Алайда, «Теңізшевройл» ЖШС-нің Үкіметпен жəне жұртшылықпен байланыс бөлімінің бас менеджері Рзабек Артығалиевтың мәліметінше, ауаға ұзақтығы 7 минутқа созылған күкірт диоксиді мен қарапайым күкірт шығарылған. Осыған орай кен орнындағы қызметкерлер мен мамандар ешқайсысы медициналық көмекке жүгінбепті.

 

Атырау облысы

 

Соңғы жаңалықтар

Ұқсас жаңалықтар