Қазақстан • 17 Маусым, 2021

Жаңа көліктер өтімді

10 рет көрсетілді

Қазақстандықтар жа­ңа көліктерді бел­сенді түрде сатып ала баста­ған. Арнайы ресми де­рек­­тер осыны растай­ды. Статистикаға сүйе­­нер болсақ, мамыр айын­да сатылған жаңа авто­көліктер саны осымен екін­ші ай қатарынан 10 мың бірліктен асып түскен.

Қазақстан автобизнес қауымдастығының дерегі бойынша отандық дилерлер мамыр айында 9402 жеңіл автокөлік пен коммерциялық техника сатқан. Сонымен қатар 695 жүк көлігі, арнайы техникалар мен автобустар сатылған. Бұл – 2020 жыл­дың мамыр айымен са­лыс­тырғанда 39,2 пайызға көп.

Жалпы жыл басынан бері ел тұрғындары 44 369 жаңа автокөлік, автобус және жүк көліктерін тақымға бас­қан. Бұлардың жиынтық өсі­мі былтырмен салыстырар бол­сақ, 68,8 пайызға жо­ғары. Қауымдастық сарап­шыларының айтуынша, қатаң локдаун мен карантин шектеулерінің болмауы­ автокөлік сатылымына сер­пін беріп отыр. Алайда жаз­дың соңғы айларында жағ­дай басқаша, яғни сатылым деңгейі төмендеуі де ықти­мал.

Өткен айда ең көп са­тылған көліктердің онды­ғы­на қандай маркалар кір­генін жіктесек, бірінші орында – Chevrolet. Мамыр айында бұл марканың 2791 данасы сатылса, Hyundai-дың 1644 данасы тұтынушылар қолына жеткен. Үштікті 1398 дана сатылыммен Toyota түйіндейді. Одан кейінгі орында Kia (1030 дана) мен Lada (702 дана) тұр. Сонымен бірге Volkswagen (465), Renault (310), Nissan (274) және Lexus (149) маркаларына қызығушылық танытушылар да артып келеді. Ондықты 135 дана сатылыммен қытайлық JAC маркасы қорытындылап тұр.

Қауымдастық мамыр айында қазақстандықтардың ықыласына ерекше бөленген көлік модельдері туралы да ақпараттарды жария еткен. Оған сүйенсек, ал­ғашқы үштікте Chevrolet Nexia (1522), Chevrolet Cobalt (1015) және Hyundai Accent (747) бар. Бұл көліктер­дің жеңілдетілген және қара­пайым несиелеу бағдар­ламалары арқылы берілуі де көлік сатылымын арттыра түсуге септігін тигізгені анық. Ең көп саудаға шы­ғарылған модельдер он­дығында Kia Rio (617), Toyota Camry (584), Toyota RAV4 (425), Volkswagen Polo (362), Hyundai Santa Fe (304), Hyundai Creta (295), Lada Largus та (285) бар.

Жақын арада еліміз­де тағы бір модель танымал­дылыққа ие болуы мүмкін. Биыл 25 мамырдан бастап елімізде жаңа Chevrolet Equinox кроссоверінің сатылымы басталды. Жаңа модель Қостанай қаласындағы «СарыарқаАвтоПромда» құ­­рас­тырылмақ. Chevrolet Equinox отандық нарықта үш түспен – ақ, қара және сұр түсте ұсынылмақ. Бағасы – 13 млн 490 мың теңге. Жоғарыдағы рейтингтің өзі айтып тұрғандай соңғы жылдары ел арасында Chevrolet маркасының таны­малдылығы еселеп артты. Осы күнге дейін Chevrolet пен Ravon-ның 19 045 данасы құрас­тырылған.

Соңғы бес жылда жалпы сомасы 140 млрд теңгеге 27 мың автокөлік жеңілдетілген несие арқылы сатылыпты.

Соңғы жаңалықтар

Ақпараттық хабарлама

Егемен Қазақстан • Кеше

Доллар тағы да арзандады

Экономика • Кеше

Ұқсас жаңалықтар