Бағдарламалар • 18 Маусым, 2021

Ел ертеңіне қамқорлық күшейеді

Батыс Қазақстан облысындағы Jas Otan жастар қанаты 2025 жылға дейінгі атқаратын жұмыстарының жоспарын бекітті. «Жастар – Отанға!» деп аталатын бағдарламаны жүзеге асыру үшін 14 жол картасы әзірленген.

Қазбек ҚҰТТЫМҰРАТҰЛЫ

Аталған жобада өңір жастарын қолдау жөнінде 2021-2025 жылдарға арналған кешенді жоспар қарастырылған. Жалпы саны 32 индикатор мен 43 іс-шара жоспары енгізілген.

Жастардың азаматтық белсенділігін дамыту, сапалы білім беру, жұмысқа орналастыру, жас отбасыларды қолдау, қолжетімді баспана, тұлғалық даму және бос уақытты тиімді өткізу секілді негізгі бағыттар әрқашан назарда болмақ. Осы бағыттар бойынша алдағы бес жылда волонтерлік қызметпен айналысатын жастардың санын 15 мыңға дейін ұлғайту жоспарланған. «Бұл көрсеткіш өкілетті органдардағы жастардың санын 40%-ға дейін арттыруға мүмкіндік береді», дейді өңір басшысы Ғали Есқалиев.

Сонымен қатар жастар арасындағы жұмыссыздықты азайту мақсатында және кәсіпкерлік бастамаларын қолдау бойынша жастарға мектепте кәсіпкерлік негіздері оқытылмақ. Алдағы 5 жылда «Жастар практикасы» бағдарламасымен 6500 жас маманды даярлау жоспарланған. Гранттық қаржыландыруды ұлғайту, мүдделі мәселе бойынша ақпараттық консультация беру, студенттік өзін-өзі басқару жүйесін одан әрі дамыту, NЕЕТ санатындағы жастармен жұмыс жүргізіп, «Ең үздік бизнес жоспар» жастар конкурсы арқылы 1000 жасты қамту қарастырылып отыр. «Дипломмен – ауылға!» бағдарламасы бойынша 615 жас маманды ауылдық жерге жұмысқа тарту көзделген. «Жасыл ел» бағдарламасы бойынша жыл сайын 1175 сарбаз маусымдық жұмысқа шығады. Студенттерге жалпы саны 2 100 орындық 5 жатақхана салынбақ. «Бастау Бизнес» жобасын іске асыру аясында жыл сайын 200 адамды оқытып, өңірде 5 спорттық-сауықтыру кешенінің құрылысын жүргізу сынды ауқымды істер жалпы облыстағы жастар арасындағы жұмыссыздық деңгейін 3,8%-ға төмендетуге мүмкіндік береді. Алдағы 5 жылда ауқымды істер қамтылады. Мұның барлығының нақты іс жүзінде жүзеге асырылуын Nur Otan партиясы Батыс Қазақстан облыстық филиалы жанындағы Жастарды қолдау жөніндегі аймақтық қоғамдық кеңес қадағалайтын болады.

Күннің маңызды және өзекті жаңалықтарын «Егемен Қазақстан» телеграм каналынан оқыңыз