Былтыр Ішкі істер министрлігінде өткен жиында Президент Қасым-Жомарт Тоқаев «Учаскелік инспекторлар – нақты аумақтағы қылмыстың алдын алудағы ең маңызды тұлға» деп олардың жұмысына жоғары баға берген еді.
Петропавл қаласындағы Екінші полиция бөлімшесінің аға учаскелік инспекторы Есен Қоңқашев соңғы 10 жылдан бері осынау тынымсыз жұмысты абыроймен атқарып келеді. «Жұмысым халыққа пайдасын тигізіп жатса, қуанамын. Халықтан алған әрбір алғыс біздің қызметке деген ынтамызды арттыра түседі», дейді ол.
Есен Есләмұлы – 1998 жылдан бері полиция қатарында қызмет атқарады. Алдымен ол жедел қызметте біраз жыл еңбек еткен. 2012 жылдан бері аға учаскелік инспектор қызметінде. Учаскеде төрт инспектор мен бір көмекші жұмыс істейді. Бірақ көмек қажет болғанда белсенді студенттер мен волонтерлер көмекке тартылады. Е.Қоңқашев қызмет ететін учаскесінің аумағында 14 520 адам тұрады.
Жоғарыда аталған жиында Президент: «Халықпен ашық әңгіме өткізіп, олардың полициядан нені күтетінін біліп отыру керек және көмек керек болғанда үнемі жақыннан табылуы керек» деген талап қойған еді.
Есен Есләмұлы – нақ осы талаптан шығып, өзінің міндетін тиянақты орындап жүрген учаскелік инспекторлардың бірі. Оның халық алдында берген есебіне бұрынғы облыстық полиция департаменті бастығы қатысып, жүздеген адамның инспектордың жұмысына айтқан алғысын өз құлағымен естіді. Осы оқиға да себеп болған шығар, қаланың учаскелік инспекторлары арасында Есен Қоңқашевке бірінші болып подполковник атағы да берілді. Бұл еңбектің жоғары бағаланғандығының белгісі.
Есен өзінің жұмысы туралы айтқанда ағыл-тегіл сөйлейді. Барлық ісіне мақтанмен емес, кәсіби білгірлікпен баға беріп жатқанына риза боласың. Екі ұлы да әке жолын қууды мақсат етеді. Келіншегі Жансая да күйеуінің тынымсыз жұмысына әбден үйреніп алыпты, отбасында еріне қашанда қолдау көрсетіп келеді.
Міне, учаскелік полицейлер арасында өте сирек кездесетін подполковниктің тыныс-тіршілігі қысқаша айтқанда осындай.
