Алматының Бас санитарлық дәрігері Жандарбек Бекшин қалада айналымдағы 90%-ға жуық мутацияланған штаммдардың таралуына байланысты қаладағы эпидемиологиялық жағдай күрделі екенін айтты.
«12-19 маусым аралығында мутацияланған штаммдардың айналымын анықтау мақсатында ПТР-диагностикасын жүргіздік. 53 зерттеудің ішінен «британдық штамм» 44-те (83%), «оңтүстікафрикалық» екі жағдайда (4%) және біреуінде «нью-йорктік» (1,8%) анықталды. Қалған 11%-да COVID-19 вирусының мутациясы анықталмады», деді Ж. Бекшин.
Санитарлық-эпидемиологиялық мекеме басшысының айтуынша, 16 маусымнан бастап жұқтыру көрсеткіші 0,7-ден 0,96-ға дейін өскен.
«Бұл демалыс орындарына барумен тұрғындардың бетперде режимін сақтау бойынша эпидемияға қарсы шараларды елемеуі салдарынан болды», деді Ж. Бекшин.
Сондай-ақ COVID-19 ауруының өсуінің негізгі себебі инфекцияның тез таралуына ықпал ететін мутацияланған штамдардың пайда болуымен де байланысты.
Сондықтан 22 маусымда эпидемиялық жағдайды бағалау матрицасында Алматы тағы да «сары» аймаққа өтті. Жұқтыру көрсеткіші жоғары.
Жандарбек Бекшин эпидемиологиялық жағдай ушыққан жағдайда шектеу шараларын бақылау 5 күн ішінде жүргізілетінін түсіндірді («жасыл» аймақтан «сарыға» немесе «сары» аймақтан «қызылға» көшу). Сондықтан Алматыда «жасыл» аймақ режимі тағы 5 күн, яғни 27 маусымға дейін сақталады.
АЛМАТЫ
