Салтанатты рәсімді ашқан Ақпарат және қоғамдық даму министрі Аида Балаева жиынның бұқаралық ақпарат құралдары қызметкерлерінің күні қарсаңында ұйымдастырылғанын атап өтті.
«Ел тәуелсіздігінің 30 жылы ішінде мемлекетімізбен бірге отандық медиа саласы да жаңару, даму кезеңінен өтті. Тәуелсіздіктің алғашқы жылдары елімізде тек 407 ақпарат құралы, соның ішінде 2 телеарна ғана болса, қазір олардың саны төрт жарым мыңнан асады.
Бір ғана Qazaqstan телеарнасы бүгінде құрамына 5 республикалық,
14 өңірлік телеарна, 4 радио енетін үлкен Ұлттық корпорацияға айналды. Ұлттық медиа тарихында тұңғыш рет балалар арнасы – Balapan, спорттық арна – Qazsport, көрерменнің көзайымы – Abai арнасы іске қосылды.
Құрамына тәулік бойына жаңалықтар ұсынатын «Хабар 24», 10 миллионға жуық көрермені бар «Еларна», әлемнің 120-дан астам еліне хабар тарататын QazaqTV арналары енген «Хабар» агенттігі бүгінде ірі медиа орталық», деді ведомство басшысы.
Министрдің айтуынша, ел аумағында 181 телеарна, 79 радио, 790 ақпараттық агенттік бар. Осындай қайнаған ақпараттық кеңістік ортасында шыңдалған журналистер арасындағы бәсеке қашанда жоғары.
«Биыл бесінші рет өткізіліп отырған «Үркер» бәйгесі – баспасөз, радио, интернет және фото журналистика саласындағы жаңа есімдерді анықтайтын бірегей жобаға айналды. Жыл сайын өзіндік қолтаңбасы бар талантты тұлғаларды халыққа танымал етіп келеді.
2017 жылдан бастап бүгінге дейін «Үркер» ұлттық бәйгесіне қатысқан
2 833 жоба қаралып, оның 55-і үздік және жүлдегер атанды. Биылғы байқауға республикалық және өңірлік ақпарат құралдарынан 340 өтініш түсті. Әрине, оның қай-қайсысы да биік марапатқа, жүлдеге лайық.
Дегенмен бәйге болған соң, оның жеңімпазын анықтау заңдылық. Әрбір еңбектің өтеуі болуы тиіс. Бүгінгі шара да осы ниетпен ұйымдастырылып отыр.
Сондықтан ауқымды жұмысты байыпты бағалап, лайықты саралаған жоғары білікті қазылар алқасына зор алғысымды айтамын және кіл жүйріктен кім жүйрікті анықтауда әділ шешім шығарды деп сенім білдіремін», деді Аида Балаева.
Сонымен, «Тәуелсіздіктің 30 жылдығына арналған үздік материал» аталымы «Семей таңы» газетінің тілшісі Риза Молдашеваға бұйырды. Марапатты тәуелсіз Қазақстанның алғашқы Ақпарат министрі, мемлекет және қоғам қайраткері Қуаныш Сұлтанов тапсырды.
«Жылдың үздік репортажы» аталымында BaigeNews.kz порталының журналисі Әнуар Әбдірахманов жеңімпаз атанды. «Жылдың үздік аналитикалық материалы» аталымы «Ақиқат» журналының қызметкері Дина Имамбаеваға бұйырды.
«Жылдың үздік танымдық материалы» аталымында
Massaget.kz порталынан Өмірбек Сансызбаев жеңіске жетті. Айта кетерлігі, жүлдені Қырғыз Республикасы Мәдениет, ақпарат, спорт және жастар саясаты министрінің орынбасары Салтанат Аманова табыс етті.
«Жылдың үздік журналистік зерттеуі» жүлдесін Aiqyn газетінен Рысбек Қыдырбек иеленді. Ал «Жылдың үздік сұхбаты» аталымында Vlast.kz порталының журналисі Тамара Вааль үздік шықты.
«Жылдың үздік жаңалықтар порталы» аталымында «ҚазАқпарат» халықаралық ақпарат агенттігі жеңіске жетті. «Жылдың үздік газеті» марапаты TÚRKISTAN халықаралық саяси апталығына бұйырды. «Жылдың үздік фотосуреті» жүлдесі newsroom.kz порталының фотосуретшісі Мақсат Шағырбаевтың қанжығасына байланды.
«Радиостанциядағы үздік жоба» аталымында NS радиосы «Новое утро» бағдарламасы үздік деп танылды. Forbes Kazakhstan ұжымы «Жылдың үздік журналы» атанды. URKER-2021 ұлттық бәйгесі арнайы жүлдесі «Қазақ радиосы» ұжымына берілді.
Айта кетейік, URKER-2021 Ұлттық бәйгесі биыл 11 аталым бойынша өткізілді. Сондай-ақ «Тәуелсіздіктің 30 жылдығына арналған үздік материал» аталымы қосылды. Үздік жұмыстарды беделді журналистер, еліміздің шығармашылық зиялы қауым өкілдері мен халықаралық медиасарапшылардан құралған қазылар алқасы анықтады.
Баспасөз, радио, интернет-журналистика саласындағы жетістіктері үшін берілетін қазақстандық Ұлттық URKER сыйлығы талантты журналистер мен шығармашылық ұжымдарды анықтау, олардың кәсіби журналистиканы дамытуға қосқан үлесін бағалау және олардың шығармашылығына қоғамның назарын аудару мақсатында 2017 жылы тағайындалған.
Байқауды ұйымдастырушылар – Ақпарат және қоғамдық даму министрлігі, «Медиа дамыту қоры» корпоративтік қоры және «Қазмедиа орталығы» БК. Іс-шара демеушілері – «Қазақстан» РТРК» және «Хабар» агенттігі» акционерлік қоғамдары.
