Ең көп өтініш Қостанай облысынан келген – 118. Одан кейін Алматы қаласы (83) мен Қарағанды облысы (65) өндірушілерінің белсенді екені байқалады. Ең аз өтінім Маңғыстау облысынан (5) келіп түсіпті. Шығынды өтеу жайлы ұсыныстардың 21 пайызы ірі кәсіпкерлік субъектілеріне, 22 пайызы орта және 57 пайызы шағын кәсіпкерлікке тиесілі.
«Өтініштердің басым бөлігі – тауарларды жеткізу шығындарымен байланысты. Сонымен қоса тауарлар айналымы бойынша да өтініштер көп. Яғни қазақстандық тауарларды шетелде жарнамалау мен жылжытуға, тауарларды қоймада сақтауға, нарықтарда тауар белгілерін тіркеуге және техрегламенттерге сәйкестік рәсімдерінің өтуіне қатысты шығындар. Ведомствоаралық комиссия 11 отырысының қорытындысы бойынша 307 компаниядан 2 356 млн теңге сомасына 132 өтінім шығындарды өтеуге мақұлданды» делінген компания хабарламасында.
2019 жылы мемлекеттік қолдау алған компаниялар өндіріс көлемін 9 пайызға, экспорттық түсім көлемін 3 пайызға арттырыпты, нәтижесінде салық аударымдары көлемі 45 пайызға өскен. Бұл жаңа 755 жұмыс орнының ашылуына ықпал еткен.
Ал біздің тауарлар әлемнің 29 еліне тікелей экспортталыпты. Оның арасында қазақ тауарларын жаңадан импорттай бастаған Оңтүстік Корея, АҚШ, Сауд Арабиясы, Оман, Кувейт сияқты елдер бар. Былтыр мемлекет қолдауын алған компанияларда экспорт деңгейі 90 пайызға дейін өсім көрсеткен. Салық аударымдарының көлемі 83 пайызға ұлғайған.
«Шикізаттық емес экспорт шығындарының бір бөлігін өтеу бойынша мемлекеттік қолдау алған экспорттаушылар 3 034 жаңа жұмыс орынын құрды. АҚШ, Мексика, Тайвань, Израиль, Франция, Эстония, Канада сияқты жаңа экспорттық елдер пайда болды» делінген QazTrade мәлімдемесінде.
