Вакцина бизнесті де сауықтырады

Індетке тойтарыс берудің бірден-бір амалы вакциналау екені түсінікті. Халықтың басым бөлігі вакцина алып, ұжымдық иммунитет қа­лып­­тасқан жағдайда ғана қалыпты тіршілігімізге орала аламыз. Бірақ елімізде вакциналардың қолжетімді қоры қаншалықты қамта­масыз етілгенімен, оны сал­дырып жатқандардың көр­сеткіші көңіл көншітерлік емес. Сондықтан індеттің та­ралу қарқыны әлі де бә­сең­демей отыр. Көпшілік орын­­дарда маска тағу, ара­қашықтық сақтау сияқты қазіргі қысылтаяң шақтың қа­рапайым ережелері сақ­тала бермейді, одан қалса жасырынып думанда­татын жұрт та аз болмай тұр. Мұндай келеңсіз жағ­дайларды арнайы мониториг топтар жиі анықтап жатыр. Кәсібін жүргізуде ка­рантин талаптарын сақ­тамайтындар белгілі бір дең­гейде індеттің одан сайын өршуіне жол беріп отыр. Яғни вакциналанбағандар үшін түрлі бизнес орындарының есігі ашық болған сайын онда бас сұғатын көпшілік те басына індет қаупі төн­бей, вакцина салдырудың жауап­кершілігін ұғына бер­мейді. Бұл ретте вакци­налау­дың қарқынын арт­тыруға кәсіпкерлердің атсалысуы маңызды.
Жақында Нұр-Сұлтан қа­ласында «Үнді» штамының анықталуы карантин талаптарын қатайтуға себеп болды. Жаңа қаулы 27 маусым­нан бастап күшіне еніп, кәсіпорындардың жұ­мыс ре­жіміне өзгерді. Жаңа қаулы ҚР аумағында корона­вирус инфекциясының пайда болуы мен таралуына жол бермеу жөніндегі ве­дом­ствоаралық комис­сия отырысының 2021 жылғы 22 маусым күн­гі хат­­­та­масына сәйкес қабыл­данды. Құжатқа сәйкес, мем­­­­лекеттік органдардың, ұлттық компаниялардың, кәсіпорын­дардың әкімшілік қызметкерлерінің кемінде 80%-ы қашықтан жұмыс істеу тәртібіне көшуі керек. Ал вакциналауды толық қабыл­даған қызметкерлер офлайн режімдегі жұмысқа жіберіледі. Бұл ретте соңғы 3-6 ай ішінде Сovid-19-ға қарсы вакциналаудың толық курсын алған және коронавирус­пен ауырып жазылған бар­лық қызметкердің күн­дізгі режім­де жұмыс істеуіне жол беріледі.
Расында, кез келген са­ладағы жұмысшының вакцина салдыруы ең алдымен өзінің қауіпсіздігі әрі ісінің іркіліссіз жүруі үшін қажет. Мәселен, елордадағы Zeken-moda тігін шеберханасының басшысы Қайролла Әбішев вакциналау кез келген кәсіп­тің жандануына септігін тигі­зетінін атап өтті.
«Біздің жұмыста бәрі вакцинаны саналы түрде салдырып жатыр. Яғни ешқандай мәжбүрлеу жоқ. Өйткені жұмыс­шылар вакцина алмай, ісіміз өнімді болмайтынын түсінді. Осы уақытқа дейін тігіншілерімізге тапсырыс­тарды үйінде отырып орын­дауға тура келді. Бірақ бұл жұмыс процесін айтарлықтай тежейді. Бірақ қашықтан істеу­ден басқа амал жоқ еді. Енді қолжетімді әрі тиім­ді вакцина барда ісімізді қай­та қолға алмасақ болмайды. Қазір вакцина алудың аса қажет екенін түсінетін кез жетті. Әрі клиенттермен де бетпе-бет жүздесіп, тапсы­рыстарды нақтылап алған жөн. Бүгінде біздің жұмысшылардың басым бөлігі вакцина салдырды. Басын­да көбі Спутник V вакцинасын салдырған, қазір Hayat Vax-ты алғанды құп көр­гендер де бар», дейді кәсіп­кер.
Нұр-Сұлтан қаласының әкімі Алтай Көлгінов Instagram парақшасында вакцина­­ция­­ланған қызмет­кер­лердің қа­тары аз болса ны­­санның жұ­мы­сы тоқтаты­латынын мә­лім етті.
«Биыл әлеуметтік нысандар, яғни қолжетімді, жеңіл­дікті тұрғын үй, оқу орындары, аула клубтары және басқа да нысандар құрылысының көлемі ұлғайды. Ірі құрылыс компанияларының басшыларымен кездестік. Жұмыс жос­парын талқылап, уақытын белгіледік. Эпидемиялық жағ­дайды және нысанда жұмыс істейтін адамның көп­тігін ескере отырып, міндетті түр­де вакциналау (меди­ци­на­лық тұрғыда рұқсат етілме­гендерден бөлек) ұсынылды. Вакциналау нысанда жұмыс істейтін қызметкерлерді және олардың отбасыларын, сон­дай-ақ айналасындағы жұрт­­ты қорғайды. Осылайша коро­навирустың таралуы тоқ­тай­ды. Вакциналанған қыз­мет­керлердің қатары аз болса ны­санның жұмысын тоқ­татуға мәжбүр боламыз. Себебі елордамыз бен тұр­ғындарымыздың қауіпсіздігі бәрінен жоғары», деп жазды елорда әкімі.