Коронавирустың алдын алу үшін ең қажетті шараның бірі вакцина екенін әлемдік тәжірибеден анық көріп отырмыз. Сондықтан Батыс Қазақстан облысында да екпе алу ісі жүйелі жолға қойылды. Бүгінде өңірде облыс бойынша 66 екпе пункті жұмыс істейді.
Ал мүгедектер қатарындағы мүмкіндігі шектеулі адамдарды вакциналау үшін арнайы топ олардың үйіне барып, екпе жасап жүр.
– Батыс Қазақстан облысында халықты коронавирус инфекциясына қарсы кезең-кезеңімен вакциналау шарасы 2021 жылдың 1 ақпанынан басталды. Вакцина аумақтық медициналық ұйымдардың егу пункттерінде, ал арнайы контингентті вакциналау тиісті ведомствоның қызмет орны бойынша жүргізіледі. Халық үшін вакцинаны қолжетімді ету және егу процесін жеңілдету мақсатында жылжымалы егу пункттерін, көшпелі егу бригадаларын ұйымдастырдық. Бүгінде екпе пункттері барлық ауданда бар, – дейді санитарлық-эпидемиялық басқарманың баспасөз хатшысы Әдемі Ғибратқызы.
Өңірде соңғы күндері екпе алу ісі қарқын ала түскен. Мәселен, 27 маусымдағы мәліметте вакцинаның 1-компонентін 90 658 адам, 2-компонентін 59 961 адам алғаны хабарланды. Ал 29 маусымда облыста вакцинаның 1-компонентін алғандардың саны 92 896 адамға, 2-компонентін алғандар 61 459 адамға жеткен. Яғни екі күн ішінде 2 238 адам екпенің алғашқы дозасын алса, 1 498 адам екінші мәрте егіліп, вакцина төлқұжатына ие болған.
Батыс Қазақстан облысы
