Әйелдер арасындағы айтулы дода 2021 жылдың 24-қыркүйегі мен 1 қазаны аралығында өтеді. Алғашында оған тек ел чемпионы «Алтай» ғана қатысуға тиіс еді. Күні кеше құрлықтық квотаның «Жетісуға» берілгені мәлім болды. Осылайша, еліміздің қос командасы күзде Таиландқа аттанады.
Естеріңізге сала кетейік, Азияның клубтық чемпионаты 1999 жылдан бері үздіксіз ұйымдастырылып келеді. Сол аралықта Қытайдың – сегіз, Таиландтың – алты, Жапонияның – үш, Қазақстанның – екі және Оңтүстік Кореяның бір ұжымы алтыннан алқа тағынды.
Қазақстанның командалары арасында Алматының «Рахаты» (2004, 2007) екі рет топ жарса, «Жетісу» (2010, 2013) екі рет күміс медальді мойнына ілді. Сондай-ақ, талдықорғандықтар екі мәрте және алматылықтар бір рет қола жүлдені иеленді.
