Аймақтар • 06 Шілде, 2021

Атырауда 150 орындық жатақхана пайдалануға берілді

Астана күні қарсаңында С.Мұқашев атындағы жоғары политехникалық колледжінің жатақханасы пайдалануға берілді, деп хабарлайды Egemen.kz.

Жолдасбек КӨШЕРБАЙҰЛЫ

Облыс әкімі Махамбет Досмұхамбетовтің айтуынша, жаңа жатақхана Елбасының «Бес әлеуметтік бастама» бағдарламасын іске асыру аясында салынған.

«Елімізе әлемдік стандарттарға сәйкес білім берудіқалыптастыру үшін студенттерге қолайлы жағдай жасау қолға алынып отыр. Бұдан былай 150 орындық жатақханаға орналасқан политехникалық колледждің студенттеріалаңсыз білім алады» деді облыс әкімі Махамбет Досмұхамбетов.

Колледж директоры Бағыт Шеркешбаеваның мәліметінше, бес қабатты жатақхананың жалпы ауданы – 720 шаршы метр. Жатақхананың «А» блогындағы 125 орынға студенттер орналасады. Ал, «В» блогындағы 25 орыноқытушыларға арналыпты.

«Бөлмелер секцияларға бөліген. Әр қабатта оқу бөлмелері, ас үй, асхана, кір жууға, киім үтіктеуге арналған бөлмелер, үстел ойындарының бұрышы орналасқан. Ал,бірінші қабатта фитнес-зал, йога залы, кітапхана, демалыс бөлмесі, интернетке қосылған коворкинг-орталық орналасқан.Жатақханада қауіпсіздік үшін бейнебақылаумен жабдықталды» дейді Бағыт Шеркешбаева.

Жатақханаға алғашқылардың қатарында орналасқан студенттің бірі – Сайполла Бектас. Қазір ІІІ курста оқитын Исатай ауданынан келген.

«Екі жыл бойы пәтер жалдап тұрдым. Пәтер жалдау үшін ай сайын 70 мың теңге төледік. Енді колледждің жанынан салынған жатақханада тұрамын. Жатақхананың жайлылығы ұнады. Бос уақытымда спортпен шұғылдану мүмкіндігі бар» дейді С.Бектас.

Жатақхананың құрылысын «АС-құрылыс» ЖШС жүргізіпті. Серіктестік директорының орынбасары Нұрлан Дилхановтың айтуынша, ғимараттың жалпы құны 670 миллион теңгені құрайды.