АУЫЛДЫ ӨРКЕНДЕТУГЕ ҮЛЕС ҚОСАДЫ

Бұдан екі-үш ай бұрын “Нұр Отан”ХДП Ақтөбе облыстық филиалы “Жас Отан” жастар қа­на­тының белсенді мүшелері  елі­мізде бірінші рет “Ауылдың өр­кен­деуі – Қазақстанның өркен­деуі” марафон-эстафетасын өт­кі­зуге бастама көтерген болатын.Бұл бағалы бастама “Нұр Отан” ХДП  облыстық филиалы, облыс бас­шы­лығы, облыстық ішкі саясат бас­қармасы тарапынан қолдау тауып, ұйымдастыру жұмыстары басталып кеткен-ді. Облыс әкімдігінде сту­денттік құрылыс және “Жасыл ел”  жасақтарына, оқушы жастардың “Ауылдың өркендеуі Қазақстан­ның өркендеуі” марафон-эстафе­та­сына қатысушылардың облыс­тық слеті өткізілді. Слетке  облыс басшылары, Ақтөбе қалалық және аудандық штабтардың бастықтары, “Нұр Отан” “Жас Отан” жастар қа­натының мүшелері, марафон-эстафетаға  қатысатын оқушы жастар, студенттік құрылыс және “Жасыл ел” жасақтарының коман­дирлері, құрылыс мекемелерінің басшылары, үкіметтік емес ұйым­дар, саяси партиялар мен арда­гер­лер ұйымдарының, ата-аналар қауымдастығының өкілдері қатыс­ты. Олардың арасында 300 жасақ­тың командирлері бар. Олар осы ма­рафон-эстафетаға қатысушы­лар­дың жұмысын ұйымдастырады, атқарылатын шаруаларға мұрын­дық болады. Слетті кіріспе сөз сөйлеп ашқан облыс әкімінің орынбасары Сара Нұрқатова бұл акцияға облыс бойынша 50 мың жас қатысаты­нын, мұндай бағалы бастаманың жастардың бойында еңбекқорлық қабілетті қалыптастырып қана қой­май, отансүйгіштік, елжанды­лық қасиетті де орнықтыратынын жеткізді. Елді мекендерді көгал­дан­ды­ру, көріктендіру жұмыстары басталғанын, алғашқы күндері әр отбасы өз үйінің маңына ата-әже­сі, ата-анасы, балалары-немерелері үшін үш түп көшеттен отырғызуға ұйытқы болуы қажеттігін айтты. Сонда облыс бойынша 300 мың түп көшет отырғызылады екен. Слетте облыстық ішкі саясат бас­қармасының бастығы Ахат Мырзалин сөйлеп, жастарға облыс әкімдігі тарапынан жасалып отырған қолдау-көмекке тоқталды. Биыл студенттік құрылыс, “Жасыл ел” жасақтарына және аталған  марафон-эстафетада үздік еңбек еткен ұжымдар мен жастарды ма­рапаттауға облыс әкімдігі 50 ав­то­мобиль мен 1000 ноутбук бөліп отырғанын жастарды қолдаудың нақты мысалы ретінде келтірді. Елді мекендерді тазартуға, көшет­тер егіп, абаттандыру жұмыстарын тиянақты да тындырымды атқару­ға қолайлы жағдай жасалған. Бюд­жеттен осы шараларға 500 млн. қаржы қаралған. Жастарға  киім­дер беріліп, олар тегін тамақ­тан­дырылатын болады. Бұл бағалы бас­таманың қайтарымды болаты­ны­на да күмән жоқ, деді А.Мыр­залин. Ақтөбе политехникалық кол­леджі­нің оқушысы Парасат Аққа­лиев студенттік құрылыс отря­дында бірнеше жыл жұмыс істеп, еңбектің дәмін татып қалған жас екен. Ол өткен жылы еселі еңбегі үшін облыс әкімі Елеусін Сағын­дықовтың қолынан жеңіл авто­көліктің кілтін алыпты. Маңдай терлетіп еңбек етудің еленбей қал­майтынын тілге тиек еткен ол жастық жалынмен жұмыс істеудің тиімділігіне тоқталды. Мұғал­жар­лық Марат Зиядинов ауыл жас­та­ры 42 елді мекенді абаттандыруға атсалысатынынан хабардар етті. Ал Қобда ауданы Жиренқопа орта мектебі директорының орынба­сары Сұлушаш Құттыбаева өзінің туған ауылын, өскен ауласын өз қолымен көріктендіріп, көгалдан­дырған баланың әсемдікті бағалай білетінін жеткізді. Слетке қатысушылар марафон-эста­фетаны табысты өткізуге, ел дамуына өзіндік үлес қосуға жұ­мы­ла атсалысу үшін облыс жас­та­рына арнап үндеу қабылдады. Салтанатты шарадан кейін  жастар қаланың көрікті жерлерін тама­шалады. Сатыбалды СӘУІРБАЙ,  Ақтөбе облысы.