Datafolha сауалдамасы көрсеткендей, бразилиялықтардың 54 пайызы Бразилияның төменгі палатасы ұсынған Болсонароға қарсы импичмент жариялауды қолдайды.
Джон Хопкинс университетінің мәліметінше, COVID-19 вирусын «кішігірім тұмау» деп қабылдаған скептик Болсонаро бірнеше ай бойы қоғамдық қысымға, соның ішінде, бірнеше ірі наразылық пен Сенаттың тергеуіне тап болды. Мұндай әрекетке пандемияның Бразилияны күйретіп, вирустың 531 000-нан астам кісінің өмірін жалмауы себеп болды.
Жақында болған бірқатар жанжал, соның ішінде ел Үкіметі коронавирусқа қарсы вакцина сатып алу кезінде жіберген құқық бұзушылықтар және сыбайлас жемқорлыққа қатысты айыптау президентке деген сенімді азайтты.
Өткен айда федералдық тергеушілер Үндістанның Bharat Biotech, Covaxin компаниясы шығарған COVID-19-ға қарсы вакцинасының 20 миллион дозасын сатып алуға қатысты 1,6 миллиард реал (320 миллион АҚШ доллары) тұратын мемлекеттік келісімшартты тексеру жұмысын бастағанын мәлімдеді.
Бас прокуратура (PGR) Pfizer Inc және Johnson&Johnson-мен ұқсас мәмілелер жүргізілгенге дейін ақпан айында қол қойылған Bharat компаниясымен келісімшартқа күмәнмен қарайды. Өйткені үндістандық компания салыстырмалы түрде жоғары бағалар ұсынып, келіссөздер мен реттеуші органдардың мақұлдауы тым жедел өткен.
Болсонаро «Денсаулық сақтау министрлігінде үлкен сыбайлас жемқорлық схемасы бар деп хабарланғаннан кейін ешқандай әрекет жасамады» деген айыппен келіспей, бұл пікірді жоққа шығарды.
Сенбіде радиоға берген сұхбатында Болсонаро шенеуніктер Covaxin-мен мәмілеге келу туралы алаңдаушылықтарын бөліскеннен кейін шара қолданғанын айтты, бірақ ол нақты қандай тапсырма бергенін егжей-тегжейлі айтпады.
«Мен ай сайын көптеген тақырып бойынша түрлі оймен келетін 100 адаммен кездесемін. Мен бұл жағдайда шаралар қабылдадым», деді ол Бразилияның оңтүстігіндегі Gaucha радиосына.
Өткен аптада Болсонаро федералдық депутат ретінде көмекшілерінің жалақысын қысқартуға бағытталған схемаға қатысты деп те айыпталды.
Бұрынғы келіні Болсонароның ұжымдасқан бопсалаушылар тобы арасындағы рөлін түсіндіретін аудиожазбалары бар деп айтқан кезде Бразилияның UOL веб-сайты сол топқа жақын адамдарды қызметкерлер ретінде жалдау, содан кейін олардан мемлекеттік жалақыны қысқарту схемасы қолданылатыны туралы хабар таратты.
Жанжалдар келесі жылы өтетін президенттік сайлауға дейін де жалғасуы мүмкін деген күдік бар. Өйткені өткен демалыс күндері Бразилияда мыңдаған адам наразылық білдіріп, оның отставкаға кетуін талап етті.
Сонымен бірге, бразилиялықтар президенттік сайлау үшін сайлау учаскелеріне барғанда қазіргі президент солшылдардың бұрынғы жетекшісі Луис Инасио Лула да Силваның да қысымына тап болады деп күтіледі.
Бейсенбіде жарияланған Datafolha өткізген жеке сауалдамада бразилиялықтардың 51 пайызы Болсонароны қолдамайтынын айтты. Бұл Болсонаро 2019 жылдың қаңтарында қызметке кіріскеннен бергі халықтың ең жоғары теріс пікірі болып отыр.
