Фото: Константин Шелков
Екібастұздың 85 жастағы тұрғынының туыстары қалалық аурухана дәрігерлерінің немқұрайлылығына шағымданды.
Бұл туралы олар әлеуметтік желілерде жариялаған. Егде жастағы әйел пневмонияға шалдыққан. Рентген және тест нәтижелері бұл диагнозды растады. Зейнеткер ем-дом алған. Кейін стационардан шығарылды. Мәселе осы жерде ушыққан секілді.
- Оны ауруханадан шығарып, кірпішке отырғызып, кетіп қалды. Бір әйел өтіп бара жатып, әжені таксиге отырғызып, үйге жіберген. Неге туған-туыстарына қоңырау шалмадыңыз? Балаларының нөмірін білдіңдер ғой, - дейді зейнеткердің туыстары.
Екібастұз қалалық ауруханасында қызметтік тексеру жүргізілді. Қорытынды бойынша бөлімнің аға медбикесін қызметінен алып тастау және санитарды жұмыстан шығару туралы шешім қабылданды.
