Үкімет жастарды қолдау үшін жаңа грант тағайындады

«Грантты тағайындаудың мақсаты – жастардың белсенді әрі шығармашыл жастар қауымдастығын қалыптастыруға бағытталған және қолданыстағы бастамаларын мемлекеттік негізде қолдау», делінген құжатта.

Грант тағайындау міндеттері: 

1. Талантты және талапты жастарды қолдау;
2. Елдің әлеуметтік-экономикалық дамуы үшін практикалық қызығушылық танытатын жастардың инновациялық жобалары мен ғылыми-техникалық әзірлемелерін анықтау және қолдау;
3. Жастардың жаңа және қолданыстағы стартап-жобаларын іске асыруға жәрдемдесу;
4. Жастар арасында шығармашылық қызметті насихаттау.

Гранттың мөлшері мен санын Үкімет жыл сайын белгілейді.

Гранттар ҚР азаматтарына келесі бағыттар бойынша жаңа идеялар мен бастамаларды іске асыру үшін конкурстық негізде беріледі:

«Ғылым» - ғылымның басым секторларында жаңа ғылыми жобалар мен зерттеулерді іске асыру үшін;
«Мәдениет» - Қазақстанның мәдени мұрасын танымал етуге, халықтық мәдени дәстүрлер мен өнерді ілгерілетуге бағытталған жобаларды іске асыру үшін;
«Ақпараттық технологиялар» - жаңа IT-шешімдер мен жобаларды, оның ішінде бастаушы стартап-жобаларды іске асыру және әзірлеу үшін;
«Бизнес» - экономиканың басым секторларында жаңа бизнес-идеяларды іске асыру үшін;
«Медиа» - жаңа медиа-жобаларды, оның ішінде жастар үшін танымдық, пайдалы, қызықты контентті құру жөніндегі жобаларды іске асыру үшін.

Конкурстық өтінімдер мемлекеттік немесе орыс тілдерінде қабылданып, келесі шарттар орындалуы тиіс:

1. Жобаның сипаттамасы;
2. Жобаның бейне-презентациясы (60 секундтан артық емес);
3. Шығындар сметасының жобасы;
4. Зияткерлік меншік туралы мәліметтер (бар болса).

Құжат 2021 жылғы 20 шілдеден бастап қолданысқа енгізілетін болады.