Ер адам жанжал барысында келіншекті, артынан қылмысқа куә болған екі қызды пышақтап тастаған.
Марқұмның көршілері болса бұл күні ешқандай шуды естіген жоқпыз дейді. Қайтыс болған әйелдің есімі Зухра екен. Ол екі қызын жалғыз өзі асырап келген. Үлкені Гүлдана биыл бірінші сыныпқа баруы керек болған. Кішісі Раяна балабақшада.
«Зухра біздің үйде бір жылдан бері тұрып келген. Қыста ол ата-анасымен тұратын. Жаз келе үлкен кісілер қаланың сыртына көшіп кетті. Балалары біздің балалармен аулада ойнайтын. Жақсы адамдар еді... Оларды өлтіріп кетті дегенді естігелі әлі өзімізге келе алмай отырмыз», дейді марқұмның көршісі.
Қылмыс болған үйдің тұрғындары Зухраның үйінен ешқандай ер адамды көрмегендерін айтады. Марқұм сауда үйіндегі азық-түлік сататын бөлімде сатушы болып жұмыс істеген. Жұмыста болған уақытта қыздарға туыстары қарап қалған.
Қазіргі таңда бір отбасын қырып салды деген күдікті қамауға алынды. Оның жасы 36-да. ҚР Қылмыстық кодексінің 99-бабының 1-тармағы және 3-тармағы бойынша сотқа дейінгі тергеу жүргізіліп жатыр.
Еске сала кетсек, 12 шілде күні сағат 11.40-та Ақсу қаласындағы пәтерлердің бірінен зорлық-зомбылық белгілері бар әйел мен 7 және 5 жастағы кәмелетке толмаған балалардың мәйіті табылған болатын.
